A música é unha das formas de expresión cultural máis universal, e a música latina destaca pola riqueza dos seus ritmos e a súa enerxía a través do son e do movemento. Nesta aventura vas traballar catro dos seus estilos fundamentais: a cumbia, o chachachá, o merengue e a salsa.

Todos eles teñen unha orixe e identidade únicas, e foron influenciados tanto polas tradicións propias do país, como das africanas e mesmo europeas, que se foron mesturando ao longo dos anos en toda América Latina.

A pesar de ter a súa orixe moi lonxe de nós, estes xéneros non nos resultan alleos, pois forman parte da música que se escoita e baila nas verbenas de toda Galicia. As orquestras interpretan, entre outros, cumbias, merengues e salsas tan pegadizas que fan que todo o público se poña a bailar. Estes ritmos latinos intégranse perfectamente co repertorio festivo galego, mesturando tradición e modernidade, e conseguen unir á xente a través do baile e da festa.

Agora coñecerás as súas características principais, escoitarás algúns dos exemplos máis representativos, e serás quen de moverte coa súa música a través de diferentes vídeos ao máis puro estilo Just Dance!

Prepárate para sentir a música, coñecer as súas raíces e gozar movéndote con sons cheos de ritmo.