Actividade grupal 1 - Creando carteis

Como persoas organizadoras dun torneo deportivo seguro que queredes que o alumnado se anime a participar como público, polo que o reto deste grupo é crear un cartel para promover o voso evento.

Como podedes conseguir iso? Coa creación de carteis orixinais cos que captar a atención do alumnado e conseguir así que acuda como público.

Tede en conta que é moi importante que o cartel debe cumprir uns requisitos:

- Ser orixinal e rechamante para captar a atención do posible público.

- Ofrecer a información sobre o evento, sen abusar de moito texto.

Aquí tendes un exemplo:

Podedes observar que é un cartel que busca captar a atención de toda persoa que o vexa da seguinte maneira:

- Ten unha imaxe orixinal e rechamante sobre o concurso.

- O nome do evento aparece nun tamaño axeitado, sendo fácil de visualizar.

- As datas da celebración do evento son claras.

- Non hai moito texto.

- Aparecen as persoas organizadoras ou co-organizadoras. É importante que as posibles persoas participantes saiban quen o organiza.

Se vedes un cartel deste concurso, gustaríavos acudir como público? Por que?

Actividade grupal 2 - Creando a presentación do speaker

Ser speaker tamén leva o seu traballo de preparación.

Hai moitas cousas que improvisar, pero tamén é necesario levar preparados datos e información relevante que transmitir en determinados momentos.

Como se xoga ao deporte que se vai practicar? Quen xoga en cada equipo? Que canción poderiades meter en cada momento de partido? 

Cada torneo é un mundo e tedes que estar preparados e preparadas para calquera situación que atopedes. A improvisación tamén se adestra! Empezade a facelo! 

Actividade grupal 3 - Creando o decálogo de normas

Cada grupo debe crear un decálogo de normas. Deberedes citar e explicar as 10 normas de xogo máis importantes do voso deporte. 

Recordade incluír aspectos como o espazo de xogo, a forma de puntuación, o número de xogadores e xogadoras por equipo, o tempo de xogo, o material que se utilizará, que actos son infracción e cales non, como se gaña un partido...

Ademais de realizar un documento ilustrativo do mesmo, seredes os encargados e encargadas de transmitilo ao resto de participantes e, como non, de arbitrar os partidos do torneo. Que se cumpran as normas está nas vosas mans! E no voso asubío...

Actividade grupal 4 - Creando a acta e o cadro de partidos

Para o control dos partidos levaredes unha acta, que teredes que crear, onde rexistrar a puntuación, xogadores e xogadoras participantes e todo aquilo que necesitedes anotar segundo o regulamento do voso deporte.

Ademais, tedes que crear o cadro de competición dependendo do número de equipos participantes: liga a 1 volta, liga a 2 voltas, liga e playoff, eliminatorias directas, repesca... Tedes moitas opcións!

Tratade de escoller a que máis partidos involucre a todas as persoas participantes, xa que o fundamental será iso, practicar! E gozar!

Actividade grupal 5 - Vídeo resumo da xornada

Na actualidade, as redes sociais copan toda a información necesaria de calquera evento deportivo. 

Na nosa propia man, e en menos de 2-3 minutos, podemos descubrir todo o que sucedeu nunha xornada deportiva.

Como bos xornalistas, seredes quen vos encarguedes de realizar un resumo da xornada, gravando as xogadas máis importantes, resumindo os resultados e clasificacións e entrevistando protagonistas da xornada dando a súa opinión sobre o voso deporte en xeral e sobre o partido disputado en particular.

Utilizaredes o formato vídeo, non indo máis aló de 2-3 minutos. Tratade de facer vídeos con concisión, dinamismo e entretemento para captar a atención da xente o mellor posible.