Evento no que participan diferentes xogadores ou xogadoras, individualmente ou por equipos, xogando todos/as contra todos/as, a unha ou varias voltas.

As ligas están formadas por xornadas nas que o ou a participante, ou o equipo, xoga con outro en roldas non eliminatorias. En función do resultado, en cada encontro vanse dando puntos aos ou ás participantes, gañando o torneo quen máis puntos teña ao final. Nalgúns deportes danse puntos ao empatar o partido, mentres que noutros non hai esta posibilidade.

A ter en conta na organización das ligas:

1. Establecer se a competición será a unha volta ou a dúas.
2. Elixir o sistema de puntuación por vitoria, derrota e empate que recibirá cada equipo en cada xornada e as posibilidades de clasificación final en caso de empate entre equipos ao final da liga.
3. Para facilitar o manexo do calendario de puntuación adxudicar un número a cada equipo.
4. Tratar de que os e as participantes teñan o mesmo tempo de descanso entre partido e partido.

Exemplo de liga:

Liga de 5 equipos con ida e volta e sen contar os empates.

As persoas participantes van enfrontándose por eliminatorias ata chegar a unha final. O cadro de partidos é elixido pola organización por sorteo ou por niveis ou ranking dos participantes (normalmente evitando que os ou as participantes con maior nivel se enfronten nas primeiras roldas).

O equipo que gaña pasa de rolda e o que perde queda eliminado, aínda que hai torneos nos que pode seguir xogando para fomentar a participación:

1. Repescas: os equipos ou xogadores/as que perdan teñen a oportunidade de reincorporarse nalgunha das seguintes roldas. Por exemplo, é moi común en deportes de loita como o Judo.
2. Roldas de consolación: os equipos eliminados e que só xogaron 1 ou 2 partidos poden xogar entre eles nun cadro de eliminatorias diferente ao principal.

A ter en conta na organización das eliminatorias:

1. Seleccionar o número de roldas en función do número de equipos, sempre tendo en conta que os equipos sexan potencia de 2: final (2 equipos), semifinais (4 equipos), cuartos de final (8 equipos), oitavos de final (16 equipos), dezaseisavos de final (32 equipos)... No caso de que esta condición non se cumpra, inicialmente algúns equipos farán unha rolda previa e outros comezarán directamente na rolda seguinte.
2. Elixir se o cadro de eliminatorias se fai por sorteo ou por cabezas de serie (tendo en conta unha clasificación anterior evitando que se enfronten os mellores inicialmente).
3. Respectar a orde dos enfrontamentos para que todos os equipos descansen o mesmo.
4. Decidir se facer roldas de consolación ou repescas.

Exemplo de cadro de eliminatorias:

Eliminatorias desde cuartos de final con 8 equipos.

Nos torneos por extensión ou por ranking cada participante ou equipo reta a outro mellor clasificado e, se vence, gáñalle o posto ou suma un maior número de puntos, co obxectivo de chegar ao primeiro posto e manterse nel.

A ter en conta na organización dos torneos por extensión:

1. Quen participa ten que ter moi claro inicialmente como son as normas do torneo e as súas responsabilidades na organización.
2. Tratar de que todo o mundo teña as mesmas oportunidades de subir postos na clasificación.
3. Inicialmente pode partirse de posicións por sorteo ou por clasificacións previas.

Exemplos de torneos por extensión:

Simulan en forma a algún obxecto.

Combinación dos anteriores. O máis habitual é combinar unha fase de grupos previa en formato liga e eliminatorias posteriores tendo en conta as clasificacións da liga previa para facer os enfrontamentos.