A partir da estrutura cooperativa “Folio xiratorio” o grupo elaborará unna pequena historia cun Golem de protagonista.

Fase 1. Elaborar o esquema do relato.

1. Elaboración individual do esquema do relato: No grupo cooperativo (A, B, C, D) cada membro empregará un rol inicial: Personaxes, Misión, Lugar, Antagonistas. Nesta fase individual, (5 minutos) cada alumno/a desenvolverá individualmente no seu caderno.
   • Un lugar (ex.: unha aldea medieval xudía, unha cidade futurista baixo asedio).
   • Dous personaxes (o Golem + outro, humano ou non, con motivacións claras).
   • ** Un antagonista** (un militar despiadado, un emperador cruel, un sistema policial represivo…)
   • Unha misión de protección (ex.: o Golem defende unha biblioteca sagrada, ou un neno/a).
2. Comprobación de coherencia. O grupo comprobará que a historia no seu conxunto ten coherencia e introducirá os cambios precisos.

Fase 2. Redacción.

Unha vez todo o grupo esté familiarizado co esquema narrativo, cada membro do grupo desenvolverá unha función concreta no avance do texto: describir o ambiente, redactar o diálogo, introducir acción, recoller o pensamento das personaxes. Os roles irán cambiando en cada fase de xeito tamén rotatorio.

O folio coa narración do equipo pasa de man en man. Cada membro engade o seu papel en distintas fases ata completar o final da historia.

Fase 3: Reelaboración con IA (10 minutos)

O grupo introducirá o relato nunha IA gratuíta (ex.: DeepSeek Chat, Gemini) para reescribilo. Comparan cambios e debaten:

• Acordos: Que ideas mellorou a IA? (ex.: descricións máis vívidas).
• Desacordos: Que prefire o grupo do orixinal? (ex.: diálogos máis humanos).

Cada equipo usa unha pauta de avaliación con 10 preguntas para avaliar o resultado.