1.1 Descrición da unidade didáctica

Probablemente a existencia das forzas sexa un dos conceptos físicos máis doadamente percibidos por todas as persoas, mesmo dun xeito intuitivo. Cos nosos músculos facemos forza sobre os obxectos; coas ferramentas modificamos estas forzas; os piares dun edificio ou os tirantes dunha ponte fan forza para soportar o peso da construción; os imáns atráense e repélense, etc. As forzas están no noso contorno por todas as partes.

Na primeira parte da unidade describiremos os efectos que as forzas poden causar nos corpos, o seu carácter vectorial e os procedementos para sumar forzas. Veremos deseguido as forzas máis salientables no noso contorno habitual: peso, normal, rozamentos, forzas eléctricas, magnéticas, elásticas…

Na segunda parte da unidade analizaremos os elementos básicos das estruturas máis frecuentes que atopamos (edificios, aparellos, pontes…) así como os esforzos aos que están sometidos.