2.10 A traxedia de Macbeth

Escena I

Un ermo. Tronos e lóstregos. Entran TRES BRUXAS

A primeira das bruxas

¿Cándo imos todas tres ter outra reunión,

No lóstrego, no trono ou no trebón?

A segunda

Cando a liorta estea rematada

Cando estea a batalla perdida e gañada.

A terceira

Iso ha ser antes do solpor.

A primeira

¿E en que lugar?

A segunda

Sobre o Ermo.

A terceira

Alí atoparemos o Macbeth.

A primeira

¡Vou deseguida, Micho!

A segunda

¡O Sapo chámanos!

A terceira

¡Imos xa!

As tres xuntas

¡O bo é noxento e o noxento é bo;

pairemos entre a néboa e o sucio ar!

[...]

Duncan

¿E non desacougou iso aos nosos capitáns,

o Macbeth e o Banquo?

Oficial

¡Ai, iso si!... Como o pardal ás águias

ou a lebre ao león. Hei decirvos que foron

como canóns que levan dobre carga

e dobremente tumban no enemigo.

Non sei se quererían

bañarse nas feridas fumeantes

ou facer outro Gólgota... Pero estame indo mal,

e estas coiteladas berran pedindo axuda.

[...]