1 Descrición da unidade didáctica

Esta unidade denomínase Textos argumentativos. É recomendable que diariamente traballe con ela entre unha e dúas horas.

• Ademais, debe ter en conta as seguintes cuestións:

• A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.

• A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar (aparecen precedidos do símbolo ).

• Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

• Logo de rematada a unidade deberá ser capaz de:

• Valorar a importancia que ten a lingua oral como forma de comunicación universal.

• Expor textos orais sobre temas actuais de forma clara e concisa nas dúas linguas.

• Recoñecer e identificar as características que definen os textos argumentativos.

• Comprender diversos tipos de textos narrativos pertencentes ás dúas linguas do ámbito.

• Redactar textos escritos, de tipo narrativo e argumentativo, sobre temas de actualidade e persoais, de forma clara e concisa, nas dúas linguas do ámbito.

• Identificar e usar adecuadamente as normas ortográficas nas dúas linguas do ámbito.

• Identificar e usar adecuadamente os elementos morfolóxicos básicos de certas clases de palabras nas dúas linguas do ámbito.

• Recoñecer os tipos de xéneros xornalísticos nas dúas linguas do ámbito.

• Valorar o papel da prensa dixital ou tradicional como provedora de servizos informativos, así como da función social e cultural que cumpre.

• Identificar os elementos que forman parte do relato literario.

• Diferenciar os principais subxéneros literarios das dúas literaturas do ámbito.