Glosario

Estereotipo

Definición:: Idea aceptada comunmente.
Exemplo:: É un estereotipo que ao nenos non lles guste a cor rosa.

Misión: igualdade entre homes e mulleres

Fotografía da praza do Obradoiro cunha instalación artística de Luz Darriba. Teas de cores

Luz Darriba, artista plástica e escritora, transforma espazos públicos coñecidos co fin de facer reflexionar a sociedade sobre a necesidade de construír unha corresponsabilidade real entre mulleres e homes. É dicir, que exista unha distribución equitativa na realización das tarefas domésticas, na planificación e organización do fogar e no coidado dos fillos e fillas ou persoas maiores. De xeito que se compartan as responsabilidades superando o estereotipo de que o coidado e os labores do fogar son tarefa exclusiva das mulleres.

Darriba entende que a violencia de xénero tamén se alimenta do silencio, por iso trata de dar visibilidade aos abusos contra as mulleres nas súas obras.

Tamén leva o seu labor a centros educativos facendo conscientes da importancia de recoñecer e romper estereotipos, así como coidar a linguaxe e o comportamento diario como base para erradicar as condutas sexistas.

Nas súas intervencións, por un lado invita á comunidade a participar na acción cos seus obxectos e relatos, dando visibilidade. E por outro, involucra ás institucións para que cumpran co seu papel en relación á xustiza. Accións como a de cambiar os bonecos dos semáforos por siluetas de mulleres ou a de encher a praza do Obradoiro con retallos de tea doados por milleiros de mulleres acompañados de mensaxes persoais ou o nome de vítimas de violencia de xénero, cosidos por persoas voluntarias formando unha enorme manta; son algunhas das súas obras.

Podedes coñecer máis sobre a súa obra nesta ligazón: Instalacións de Luz Darriba.

Que pasa hoxe?

Hoxe en día a desigualdade entre mulleres e homes segue a ser unha realidade. A brecha salarial, a menor taxa de emprego feminina, o teito de cristal, a feminización do coidado das persoas e do fogar entre outras, son algunhas das causas. As manifestacións máis estremas e crueis desta desigualdade estrutural, son as cifras da violencia de xénero. A dependencia económica do home, o illamento pola sobrecarga de coidados ou falta de tempo, a falta dunha educación en igualdade nos fogares e os estereotipos sociais deben ser erradicados.

A educación e o uso dunha linguaxe inclusiva e non sexista son factores clave para esta loita.

Lectura facilitada

Luz Darriba é unha artista e escritora de Galicia.

Luz usa os lugares públicos para facer pensar á sociedade.

Luz defende que homes e mulleres compartan as tarefas da casa.

Homes e mulleres deben coidar igual dos fillos e das fillas.

Homes e mulleres deben coidar igual das persoas maiores.

Coidar da casa e da familia non é un traballo só de mulleres.

Luz di que o silencio axuda á violencia contra as mulleres.

Luz ensina estes abusos nas súas obras para que todos os vexan.

Luz tamén vai ás escolas para falar cos alumnos e alumnas.

Luz explica que é moi importante romper os estereotipos.

Debemos coidar a nosa linguaxe e o noso comportamento cada día.

Isto serve para eliminar o machismo da sociedade.

Luz pide á xente que participe nas súas obras con obxectos.

Luz tamén pide ás institucións que fagan xustiza.

Luz fixo obras moi importantes como estas:

Cambiar os bonecos dos semáforos por siluetas de mulleres.
Poñer retallos de tea de moitas mulleres na praza do Obradoiro.
Escribir mensaxes de vítimas de violencia nestes retallos.
Coser todos os anacos de tea para formar unha manta moi grande.

Podes coñecer máis sobre as instalacións de Luz Darriba na ligazón.

Hoxe en día as mulleres e os homes aínda non son iguais.

As mulleres cobran menos diñeiro que os homes por traballar.

As mulleres teñen máis difícil chegar a postos de mando.

Moitas mulleres coidan soas da casa e da familia.

A violencia contra as mulleres é a parte máis cruel desta realidade.

Debemos eliminar o control dos homes sobre o diñeiro das mulleres.

Tamén debemos educar en igualdade dentro das casas.

Usar unha linguaxe que inclúa a todos e todas é moi importante.