Sabela pasou todo o verán un pouco nerviosa. Estas vacacións na casa dos avós non foron coma sempre. En setembro quedará a vivir aquí.

Antes vivía fóra de Galicia, en Barcelona. Alí aprendeu castelán e catalán e na casa o galego, que é a súa lingua materna.

A súa familia contoulle que ten moita sorte, que aprendeu tres linguas de xeito natural, sen esforzo.

Tamén lle contaron que estas linguas proceden da mesma, do latín, polo que son da mesma familia lingüística. Na Península hai varias emparentadas, por iso cando o avó viviu no Brasil puido entenderse ben, porque o portugués é unha lingua irmá da nosa.

Imanol, o neto da veciña vive en Euskadi e ademais do galego e o castelán fala o éuscaro, que ten a súa orixe antes do latín.

O avó díxolle que pasa igual que cos paxariños dos que lle ensina os nomes, que todos pertencen á mesma familia. Tamén lle dixo que este ano aprenderanlle os nomes das familias dos animais e das linguas. Este ano aprenderá moitas cousas, vai ser emocionante.

E ti, tes a mente preparada para unha nova aventura?