Healthy Eating Plate

A universidade de Harvard vén de incorporar unha nova filosofía nos hábitos alimentarios: o Healthy Eating Plate (por certo, que significa?).

Aínda que non o pareza, no mundo da alimentación hai evolución e investigación, cada día dánselle mil voltas a cal é a mellor maneira de inxerir alimentos e detrás de cada opción hai sesudas teorías para defendela. Tradicionalmente, sempre se falou da pirámide alimentaria, sóache? Nela represéntanse os grupos de alimentos formando unha pirámide, onde os de consumo máis frecuente se sitúan na base e os de consumo ocasional aparecen na cúspide. Algo así...

Hai moitos modelos de pirámide alimentaria, pero case todos se caracterizan por considerar que a base debe estar ocupada por cereais, arroz, patacas e legumes.

O Healthy Eating Plate intenta facilitar a escolla alimentaria diaria e engade algunhas outras dimensións. Aquí tes a imaxe:

Faremos unha comparación entre a "PIRÁMIDE" e o "PRATO". Traballaremos en grupos de catro persoas, tendo en conta os seguintes pasos:

• Describimos primeiro cada unha das imaxes.
• Poñemos en relación o que propón cada un dos dous.
• Cal dos dous vos parece máis saudable ou equilibrada?
• Hai algo que vos chame a atención en cada un deles?
• Faremos o traballo por escrito e ben redactado.

Xa vos fixastes en que o prato está en inglés, non si? Seguro que non tedes problema ningún para o entender á perfección. De novo, en grupos de catro persoas, imprimiremos o seguinte arquivo e faremos as copias que precisemos da segunda páxina, para realizar a actividade que se propón a continuación.

• Anotade nunha táboa o almorzo, xantar, merenda e cea que fixestes nos últimos tres días... apretade as meninxes, tentade recordar!
• Procurade representar as cantidades de cada alimento (por exemplo: patacas con bisté e ensalada, moitas patacas, bisté normal, pouca ensalada), da maneira que está elaborado o prato do Healthy Eating Plate.
• Facede unha representación de cada unha das catro comidas do días coma a do prato da Universidade de Harvard.
  • Sáevos igual a todos os integrantes do grupo?
  • Hai algún hábito alimenticio que deberades mudar?
• Poñede en relación os hábitos alimenticios en gran grupo. Hai moitas diferenzas?

Os hábitos alimenticios non teñen que ver soamente co que se come nin con canto se come, senón tamén con cando se fai.

Fíxate nos seguintes refráns casteláns:

• A que feito de comer se están a referir? Explicade o seu significado polo miúdo.
• En que figura retórica se basea o primeiro refrán? Que quere dicir?
• No segundo, hai unha metáfora que se basea nunha relación de causa-efecto. Poderiades explicala?
• Hai algunha semellanza entre ámbolos dous refráns? En que consiste, se a hai?
• Con que refrán da primeira actividade relacionas estes dous? Por que?

Volvamos ao Healthy Eating Plate. Un dos aspectos que máis chama a atención é a inclusión dun monicreque correndo. Que quere representar?

Mantente activo! Fernando Pazos. (CC BY SA)

Estades no certo, fai referencia ao deporte e a un estilo de vida saudable. Na actualidade, xa ninguén pon en dúbida que para ter unha boa saúde non é suficiente con comer de maneira sa e equilibrada, senón que tamén é necesario ter un estilo de vida fisicamente activo. Isto non quere dicir que haxa que saír a correr todos os días, ir ao ximnasio levantar pesas ou nadar coma un golfiño, non. Simplemente lembra a necesidade de moverse para evitar estar todo o día sentado ou deitado no sofá.

• A que actividades credes que se está a referir ese “Stay Active”?
• Anotádeas no encerado e valorade o voso grao persoal de “Stay Active”.

Non nos enganemos, o sabor é importante! Credes que comendo “mellor” sempre vas comer “menos saboroso”?

A meirande parte dos alimentos etiquetados inclúen unha serie de ingredientes que en moitas ocasións non sabemos o que significan nin o que poden supoñer para a nosa saúde.

Pequeno debate:

Tedes por costume ler os ingredientes dos alimentos etiquetados?

Se é así, deixastes de mercar algunha vez un produto por conter un ingrediente que vos desagradaba?

Cando menos, ledes a data de caducidade de produtos coma os iogures, as salchichas, o leite, as ensaladas embolsadas, etc?

Hai que ser un auténtico sabio para identificar todos os ingredientes que imos atopar nos envases de comida, polo que non imos marearnos con iso. Pero si podemos aprender algo máis sobre algún destes produtos. A continuación presentámosvos o famoso xogo do aforcado no que teredes que atopar dúas palabras; as dúas xuntas forman o nome dun ingrediente que a cotío atopamos nas bolsas de gusanitos ou nos botes de olivas.

Como vos foi? Seguro que non aforcaron a ninguén, va que non! Soábavos esa substancia que se acochaba na actividade anterior? Se tedes algún envase de produto alimentario encima, mirade se aparece entre os seus ingredientes. Aparece? Pois... non debería aparecer!

A continuación imos ver dous vídeos nos que vos van falar desta substancia, tamén chamada a “nicotina” dos alimentos (oes!, se se chama “nicotina dos alimentos”, será bo ou será malo?...)

Son dous fragmentos extraídos dun vídeo máis longo da canle John Galeón TV. No primeiro coméntanse a orixe e descubrimento desta substancia e tamén os efectos que ten para a saúde No segundo explícase con que nomes pode aparecer nas etiquetas dos produtos alimentarios e en que cales é frecuente atopalo. Permanecede atentos e atentas porque ides ter que atopar certa información en cada un deles, a que se vos pide nas seguintes fichas:

Descargade as fichas correspondentes e proxectade os vídeos dúas veces.

Vídeo 1: Descubrimento, que é e efectos sobre a saúde.

Glutamato monosódico. John Galeon TV. Youtube (CC BY-SA)

Vídeo 2: alimentos onde se pode atopar e outros nomes polos que se coñece.

Glutamato monosódico. John Galeon TV. Youtube (CC BY-SA)

Vimos de ver a importancia do etiquetado á hora de mercar alimentos; a etiqueta vén sendo unha radiografía do produto que vai dentro do envase. De nosoutros depende saber interpretala correctamente.

Nesta actividade propoñémosvos buscar a información máis importante dalgunhas etiquetas escollidas ao chou. Nas vosas casas podedes facer o mesmo cos produtos que teñades nas lacenas da cociña.

Usade a seguinta ficha para recoller a información máis doadamente:

A continuación tedes imaxes de prdutos alimenticios etiquetados. Hai varias de cada produto para poder recoller a información relevante de cada un. Por equipos, escollede 4 produtos diferentes e analizádeos segundo a ficha anterior. Cando rematedes, contestade as seguintes preguntas:

1. Todas as etiquetas inclúen a información dun xeito completo?
2. Credes que hai certa información que está máis tapada?
3. Todas son doadamente interpretables ou non?
4. Credes que é interesante que inclúa a información nutricional? Por que?
5. Hai algunha información que non sinale na ficha que vos parecera interesante? Cal? Por que?