Guía didáctica

Proxecto CHEF! é un recurso dixital educativo dirixido ao alumnado de 1º curso da ESO, aínda que tamén é posible adaptalo a 2º de ESO, con algunhas modificacións.

Trátase dunha secuencia didáctica baseada no mundo da gastronomía, orientada a desenvolver todas as capacidades relacionadas coa lingua: escoitar, falar, ler e escribir. Por tanto, as materias encargadas de desenvolver o recurso son, principalmente, as de Lingua Castelá e Literatura e Lingua e Literatura galegas, e, cun menor peso, Lingua Inglesa. Porén, Proxecto CHEF! busca a transversalidade de contidos, tocando de maneira tanxencial a meirande parte das materias do currículo dende Matemáticas até Ciencias Sociais, pasando por Bioloxía ou Educación Física.

Os materiais deseñados en Proxecto CHEF! tamén desenvolven contidos relacionados coas materias de libre configuración autonómica. En concreto, resulta un recurso de utilidade para a materia Promoción de estilos de vida saudables, dado que unha correcta alimentación é sinónimo de vida e de saúde. Pero tamén Investigación e tratamento da Información atopa cabida no Proxecto CHEF!, debido a que unha das metodoloxías máis empregadas nel é a procura de información e o seu posterior procesado segundo a finalidade que se persiga.

A lingua vehicular de Proxecto CHEF! é o galego, polo que os enunciados e introducións de todos os apartados están escritos neste idioma. Dentro de cada apartado aparecen actividades, tarefas e contidos teóricos en castelán, sen que haxa (a excepción da rúbricas de avaliación final) ningunha parte traducida dun idioma a outro.

O proceso de aprendizaxe organízase en torno a un proxecto cuxo obxectivo final é a creación colectiva dun libro de cociña. Para chegar a este punto final, o alumnado terá primeiro que ampliar os seus coñecementos de gastronomía e desenvolver as súas capacidades lingüísticas a través dunha serie de tarefas e actividades, individuais e en grupo, orientadas a tal fin.

A secuencia didáctica segue a estrutura dun libro de receitas de cociña tradicional: entrantes, primeiros pratos, segundos pratos e sobremesas. Tras a motivación inicial, facemos coincidir os tres últimos apartados co ciclo de I+D+I, segundo o obxectivo final que se persigue en cada un.