Cociñas do mundo

A través da cociña internacional descubrimos usos sociais, hábitos, costumes e culturas diversas, ademais de facer un repaso importante aos nosos coñecementos sobre xeografía. Trátase dun tema tan interesante como inabarcable, posto que cada país do mundo conta cun amplo e variado receitario de produtos e pratos autóctonos. Algunhas destas elaboracións fanse coñecidas en todo o planeta, como sucede coas tapas da gastronomía española, invento emulado en moitísimos países con múltiples versións. Outro exemplo, aínda máis achegado e sorprendente, é que non resulta difícil atoparse no estranxeiro unha carta que ofreza entre os seus entrantes “Padron peppers” (de seguro alí tamén uns pican e outros non).

Clker-Free-Vector-Images. Mapa del mundo en Pixabay (CC0)

Sen ánimo de sermos demasiado exhaustivos, e tratando de acoutar a procura de información seguindo un criterio de proximidade por unha banda e de exotismo por outra, traballaremos por equipos investigando as seguintes gastronomías:

• A cociña portuguesa

• A dieta mediterránea

• A cociña xaponesa

• A cociña mexicana

Dividiremos a clase en catro equipos que se ocuparán en investigar sobre cada unha destas cociñas. Cada equipo cubrirá a ficha Investigamos cociñas do mundo e redactará un pequeno texto expositivo (en galego, castelán ou inglés) sobre ese tipo de cociña.