3-4- Mellora este texto

Estudo de caso

Imos utilizar este resumo do argumento da obra de teatro de Rafael Dieste A fiestra valdeira ) para facermos un exercicio de redacción. Imos tentar mellorar a resposta por partes. En primeiro lugar le o texto, cópiao aparte e identifica todo o que estimes que debe ser mellorado.

“Nesta obra pretendíase que a xente vise como era a Galicia nese momento. A obra trata dun señor que se fixo rico grazas ó seu antigo traballo que era ser mariñeiro. O señor un día chama a un pintor para que lle faga un cadro. Este faino a el mirando por unha fiestra onde estaban barcos. Á súa muller e á súa filla non lles gustaba ese fondo porque reflexaba o que eran antes e dáballes pobreza.

Os amigos deles quítanlle a fiestra e queda valdeira. O señor fica triste e ao ver isto a muller e a filla chaman os seus amigos para que volten pór a fiestra no cadro”.

Agora redacta unha nova versión de cada oración. Se fas trampa e miras a resposta modelo antes de faceres a túa, o exercicio non che servirá de nada.

Retroalimentación

A fiestra valdeira

(Nesta obra pretendíase ¿quen? que a xente vise como era a ¿? Galicia nese momento) Con esta obra, Dieste retrata a Galicia da época.

A obra trata dun señor ¿? que se fixo rico grazas ó seu antigo traballo que era ser mariñeiro. O protagonista é un vello mariñeiro que se enriqueceu e disfruta dunha boa posición económica. O señor un día¿? chama a un pintor para que lle faga un cadro. Decide encargarlle un retrato a un pintor.

Este faino a el mirando por unha fiestra onde estaban barcos. No cadro o mariñeiro está situado fronte a unha fiestra dende a que se ve o mar e os barcos.

Á súa muller e á súa filla non lles gustaba ese fondo porque reflexaba o que eran antes e dáballes pobreza. Precisamente ese fondo non é do agrado da súa muller e filla pois coidan que representa a pobreza da que conseguiron saír.

Os amigos deles quítanlle a fiestra ¿? e queda valdeira. Os vellos amigos mariñeiros recortan a parte da fiestra do cadro e lévana consigo, quedando o oco no lenzo.

O señor fica triste ¿? e ao ver isto a muller e a filla chaman os seus amigos para que volten pór a fiestra no cadro ¿?. O mariñeiro súmese nun estado depresivo do que o conseguen sacar a filla e os amigos ao repoñer de novo a fiestra.

« Anterior | Seguinte »