2.1.1 Trámites para a adquisición

A constitución española recoñece o dereito individual á vivenda, pero este segue a ser un dos problemas da sociedade actual. A vivenda é na actualidade un produto de uso ordinario e xeneralizado, e a compra segue a ser o máis habitual entre os consumidores galegos.

A lei protexe o consumidor en relación aos materiais esixibles, as condicións económicas da compra e a documentación esixida. O comprador pode esixir características e condicións relativas á construción da vivenda, a súa localización, os servizos e as instalacións, e os modos de pagamento, malia non figuraren expresamente no contrato.

Nome ou razón social, e datos da inscrición no Rexistro Mercantil do vendedor. Plano de emprazamento da vivenda e plano da propia vivenda, coas súas instalacións completas. Memoria de materias utilizados na construción. Datos da inscrición do inmoble no Rexistro da Propiedade, ou de non estar inscrita nel. Prezo da vivenda, con anexos se os houber, e forma de pagamento. Copias das autorizacións legalmente esixidas para a construción de vivendas.

Documentación esixible polo comprador

No prezo total da vivenda inclúense, de ser o caso, os honorarios do axente, o IVE, ou o correspondente imposto de transmisións patrimoniais e actos xurídicos documentados. Tamén debe incluír os medios de pagamento (os iniciais e os aprazados, se os houber). Se a vivenda está en construción, a normativa, obriga a pór á disposición do publico e das autoridades competentes os documentos en que se formalizan as garantías da compra.

Cando xa exista unha certeza da compra e as súas condicións, deberá acudir ao Rexistro da Propiedade onde estea inscrita a vivenda e comprobar que figure a nome do vendedor e que estea libre de cargas, máxime cando esta sexa unha vivenda de segunda man.

O promotor da vivenda responde dos defectos existentes na construción que non sexan apreciables a simple vista, durante seis meses despois da entrega. Se os defectos afectan á estrutura responderán o construtor ou o arquitecto director de obras durante os seguintes dez anos, desde o remate das obras.

O derradeiro paso despois de comprar a vivenda, logo de realizada a escritura correspondente, é inscribila no Rexistro da Propiedade como novo propietario.