2.2.4 Formas de representación

Para establecermos a dependencia ou relación entre dous valores pódense usar táboas de valoresou gráficas. A vantaxe das gráficas é seren máis atractivas para a súa análise e, xa que logo, máis apropiadas para un estudo directo e rápido da situación que se quere describir.

O xeito de representar unha determinada situación é fundamental para poder comprendela. Así, se vemos un gráfico pintado de varias cores, será moi sinxelo distinguir a proporción de datos diferentes.

Imos ver as principais formas de representar unha situación dada.

Diagrama de barras

Para o construír, cómpre debuxarmos dúas liñas perpendiculares que se crucen nun punto, isto é un sistema de coordenadas. O máis usual é que se crucen na parte inferior esquerda do gráfico, pero non sempre é así; ás veces as barras van cara a abaixo ou cara aos lados.

Na liña horizontal sitúase a variable que queremos estudar, no caso que se proporá nas actividades, os destinos preferidos (os nomes das cidades) e na liña vertical os datos que corresponden a cada destino, isto é, o número de viaxeiros con destino a cada cidade.

Despois hai que decidir o groso de cada barra, que é o mesmo en todas, e debúxanse barras de lonxitude proporcional ao número de viaxeiros, que apoian a súa base no lugar do eixo horizontal onde se sitúa cada cidade destino.

Para o completar, escríbese un título e un texto para cada eixo e coloréanse as barras.

Diagrama de sectores

Para construír un diagrama de sectores hai que empezar por debuxar un círculo. Despois hai que dividir a superficie do círculo en sectores proporcionais ao valor da variable que se queira representar. Para iso hai que sumar o valor de todas as variables, e coñecer así o valor que corresponde ao total do círculo, e a partir deste valor, calcular a parte do círculo que corresponde a cada variable. Cada sector calcúlase tendo en conta que o círculo completo ten 360º, que corresponden á suma de todas as variables.

suma das variables → 360º

valor dunha variable → xº

Cun transportador asignámoslle a cada sector os graos que lle corresponden, dividimos totalmente o círculo, coloreamos cada sector, asignámoslle a cada sector un nome e un valor, e escribimos o título do gráfico.

Gráfico de liñas

Na construción dun gráfico de liñas pártese tamén, como no diagrama de barras, de dous eixes, un horizontal e outro vertical. No horizontal sitúase a variable medida e no vertical o valor que esta alcanza en cada medida. Para rematar, os puntos así obtidos únense cunha liña continua, que pode ser curva ou de trazos rectos.