2.1.3 Manexo de buscadores: Google, Yahoo, etc

Non sempre coñecemos o enderezo completo da páxina ou das páxinas web que conteñen a información que precisamos. Podemos buscar e identificar as páxinas que conteñen esa información empregando buscadores.

O manexo de buscadores é sinxelo e permite que, entre os millóns de páxinas dispoñibles en internet, filtremos aquelas que teñen a información que queremos. Hai moitos buscadores: Google, Yahoo, etc.

Accédese aos buscadores como ao resto das páxinas web, escribindo o seu nome na barra de enderezos ou seleccionándoos en favoritos, se antes nos ocupamos de gardalos.

Cantas máis palabras empreguemos para facer a procura máis refinada será esta. Os artigos, as preposicións, as conxuncións, etc. non se teñen en conta na busca. Só se terán en consideración cando vaian entre comiñas. Este é o sistema para buscar frases enteiras.

Ademais, Google permite empregar varios idiomas para facer buscas.

Procura de imaxes

Google, o mesmo que outros buscadores, ten unha ferramenta de procura de imaxes. Seleccionándoa pódese facer unha busca das imaxes relacionadas cun determinado tema. O procedemento é o mesmo que para a busca de páxinas web: hai que escribir o tema na ventá de busca.

Para copiar unha imaxe dunha páxina web hai que colocar o apuntador sobre ela e, no botón dereito do rato, elixir a opción Gardar imaxe como... A imaxe pódese gardar nun cartafol do equipamento e posteriormente inserila nun documento de Word, ou vela con calquera das aplicacións de imaxe dispoñibles.

Tamén se pode elixir, no botón dereito do rato, a opción Copiar. Deste xeito, a imaxe pode ser pegada nun documento de texto (Word, Open Office, etc.) coa ferramenta Pegar.