Xa sabedes que o voso reto é deseñar unha saída cunha guía explicativa dos aspectos xeográficos que ides ver. Para iso seranvos moi útiles os contidos que ides aprender de seguido. Para facilitar o traballo, seguide as pautas que tedes a continuación.

Que debe incluír a Guía?

• As coordenadas xeográficas do lugar; a súa localización dentro de Galicia (usando os puntos cardinais); a súa distancia en liña recta desde o teu centro educativo e a súa altitude.
• Ruta en autobús: estradas e principais accidentes xeográficos que cruzaremos (montañas, ríos, localidades importantes...).
  Formas do relevo terrestre que apreciamos na paisaxe.
• Unha tarefa, un xogo, a realizar polo alumnado durante a visita.
• Unha relación das fontes bibliográficas e dixitais utilizadas.

Organizamos o grupo

Para conseguir resolver o reto con solvencia temos que facer un esforzo de organización grupal, tendo en conta que só podemos ter éxito se todos achegamos o noso gran de area. Temos que aceptar a opinión do grupo, non ir por libre, cumprindo os prazos, axudándonos (non todos temos a mesma facilidade para este tipo de tarefas) e contribuíndo a crear bo ambiente.

• Eliximos unha persoa coordinadora do equipo, que moderará os posibles debates e será o interlocutor co profesor ou profesora.
• Escollemos un destino.
• Repartímos os primeiros quefaceres.

Seredes quen de conseguilo? Seguro que si, o premio é ben atractivo: facer de toda Galicia un aula de xeografía! Aprender fóra da aula! Compartir viaxes cos colegas! Adiante!

Pasa a páxina e comeza a prepararte.