Unha queixa repetida por parte do alumnado é que facedes poucas saídas co instituto. Pero non pensades en que, cando ides de viaxe coa escola, seguramente non vos preocupa moito cal é a ruta a seguir, os lugares polos que pasaredes, as distancias percorridas ou o relevo do lugar a visitar. Así que na materia de Xeografía e Historia se vos propón unha saída, pero se sodes quen de planificala vós mesmos.

Acabouse confiarllo todo ao profesorado, así que deberedes ser vós os que organicedes as distintas propostas de saídas elaborando GUÍAS DE VIAXE. Se o labor está ben feito, o departamento de Xeografía e Historia comprométese a realizar a viaxe que entre todos consideredes mellor planificada.

Gústavos viaxar? Que é o que máis vos interesa dun lugar ou comarca?

Ides preparar esas viaxes, divididos en grupos de 4 ou 6 persoas. Durante o proceso de información e elaboración, cada quen ten que ir anotando as tarefas que vaia facendo no diario de aprendizaxe, co seu nome.

• Identificar e interpretar distintos tipos de mapas.
• Localizar lugares nos mapas, usando as coordenadas xeográficas.
• Comprender como se elaboran os mapas (sistemas de proxección e escala).
• Usar aplicacións dixitais para localizar e viaxar ata unha localidade, contrastando a súa información coa proporcionada por un mapa tradicional.
• Identificar distintos tipos de relevo, tanto na realidade, en imaxes, como nos mapas topográficos.
• Valorar a importancia de coidar o medio natural.
• Traballar en grupo de xeito organizado e efectivo.
• Seleccionar e xerarquizar a información.
• Expoñer oralmente o resultado do noso traballo.