Antes da inauguración

Revisión das estruturas

Cada equipo debe revisar con coidado a súa base e os edificios:

Está todo ben suxeito e equilibrado?
Hai algunha parte solta ou que poida caer?
Precisamos reforzar algo con máis cola ou cinta?
Se vemos algo que se pode mellorar, arranxámolo antes de continuar.

Proba da iluminación

Encendemos as luces e comprobamos que:

As ventás de acetato deixan pasar a luz como queriamos.
Os puntos de luz están colocados no lugar axeitado.
Non hai cables ou luces que molesten ou poidan caer.
Se temos espellos no chan, miramos como se reflicte a cidade e se conseguimos o efecto máxico que buscabamos.

Organización do espazo da exposición

Pensamos ben como será o percorrido das persoas que veñan visitar:

- Por onde entran e saen.
- Onde deben mirar cara arriba ou cara abaixo (se hai espellos).
- Que zonas poden tocar e cales non.
- Tamén podemos marcar no chan por onde deben camiñar, como nun museo de verdade.

Inauguración oficial

Escollemos unha data para abrir a nosa cidade ao público e:

- Invitamos outras clases, profesorado e familias.
- Podemos facer un acto de inauguración con música ou discursos curtos.

Despois da inauguración

Cada grupo visitará a instalación

Agora que a nosa cidade de cartón está rematada e aberta ao público, é o momento de parar un intre, mirar atrás e pensar no que vivimos, no que sentimos e no que aprendemos ao longo deste proxecto tan especial. 

- Que sentín cando vin a cidade colgada e iluminada por primeira vez?

- Que emocións cres que transmite a instalación?

Espazo de reflexión e debate

Abriremos un espazo de reflexión e debate no que en grande grupo poderemos compartir a experiencia co proxecto. Algúns puntos que debemos tratar:

- Como foi o proceso de creación.

- Que materiais se usaron.

- Que dificultades se atoparon no proceso creativo.

- Que emoción ou idea querían transmitir co seu edificio ou espazo.

- Que emocións credes que transmite a instalación ás persoas que a visitan?