Cando lemos a prensa, escoitamos os noticiarios ou seguimos as redes sociais, tendemos a asociar a palabra Islam a posicións relixiosas radicalizadas do mundo árabe ou a feitos violentos. Nada máis lonxe da realidade. A historia medieval da Península é un claro exemplo deste erro.

Con Mahoma iniciouse a civilización musulmá, que é máis que unha relixión, falamos dunha forma de vida, dunha forma de organización social, política, económica... dun xeito propio de entender a cultura e a arte, que se  estenderon polo Mediterráneo na Idade Media.

Hai dúas datas clave para entender a orixe do Islam e a súa relación coa Península Ibérica:

Ano 622 (seiscentos vinte e dous). Mahoma migra da Meca a Medina, esta viaxe chamouse a Héxira. A Península Arábiga vai cambiar a súa historia, coa aparición dunha nova relixión monoteísta, O ISLAM e un novo calendario luar, o musulmán. Así, os árabes inician a súa expansión polo Mediterráneo. Sabedes que a través deste mar chegaron ata a Península Ibérica?

Ano 711 (setecentos once). A Península Ibérica está poboada polos visigodos. Os xenerais Tariq e Muza, á fronte de 18.000 (dezaoito mil) árabes, sirios e bérberes derrotaron ao rei Don Rodrigo na batalla de Guadalete. É o inicio da ocupación da Península Ibérica polos árabes e a aparición de Al-Andalus.

O Islam é unha relixión monoteísta, practicada polos musulmáns, que cren nun só deus, Alá ou Allah, e no seu profeta Mahoma. O seu libro sagrado, O Corán, recompila as obrigas e preceptos, que rexen a súa forma de vida. Esta relixión baséase en cinco (5) obrigas fundamentais:

Ademais destas 5 obrigas, o Islam prohibe aos seus fieis beber alcol e comer carne de porco. Tamén están prohibidas as representacións do seu deus Alá e do seu profeta. Fixádevos se o consideran importante que escritores como Salman Rushdie ou a revista francesa Charlie Hebdó sufriron atentados polas súas palabras ou caricaturas sobre Mahoma.

No Islam non existen sacerdotes.

Non hai máis dogmas que os recollidos no Corán polo profeta. O Califa (= lugartenente) é a máxima autoridade política e relixiosa, encargado de protexer a fe.

O venres é o día sagrado para os fieis desta relixión

O edificio de culto dos árabes é a mesquita, que non é o lugar onde vive a súa divindade, senón o lugar onde os musulmáns rezan a Alá e invocan o seu nome. Para rezar, os musulmáns oriéntanse cara á Gran Mesquita de A Meca (Arabia Saudí), o lugar santo do Islam. No centro do seu patio está a Kaaba, construción en forma de cubo que alberga unha pedra negra. Os musulmáns cren que a Kaaba é un meteorito que caeu do paraíso no que vivían Adán e Eva e que se volveu negro polos pecados dos homes e das mulleres.

Os sucesores de Mahoma espallaron, desde A Meca (Arabia),  a súa relixión polos territorios veciños. Á morte do profeta (632, seiscentos trinta e dous) o mundo islámico estendíase pola Península Arábiga e, en poucos anos, conquistaron Irak, Persia, Siria, Norte de África e a Península Ibérica (711, setecentos once)). 

A súa forma de goberno será o califato, sistema monárquico presidido polo califa. Os territorios conquistados estarán dirixidos polos emires, converténdose en emiratos, territorios dependentes do califato.

Lembrade que Al-Andalus, o nome co que os árabes nomearon a Península Ibérica tamén tivo ese tipo de gobernos. Lembrádelos? Non? Tedes aquí unha liña do tempo para repasar as principais etapas históricas.

Mapa de expansión do Islam