A regra ou menstruación é a fase do ciclo menstrual na que o útero desprende a súa capa interna, o endometrio, xunto co óvulo non fecundado, en forma de sangue menstrual. Esta fase adoita durar 3-7 días, nos que é frecuente sentir certas molestias.

A primeira menstruación (menarquía) aparece arredor dos 12 anos, aínda que isto pode variar xa que cada nena ten o seu ritmo, podendo variar entre os 9 e os 16 anos.

Esta primeira regra vén acompañada de desenvolvemento dos peitos, aparición de pelo en axilas e zona pubiana e secreción vaxinal clara ou branca nos meses previos.

Durante os días de regra pódense usar compresas, tampóns ou copas menstruais. Depende de cada nena ou muller escoller o que lle sexa máis cómodo.

A cantidade de sangrado tamén varía dunhas persoas a outras, ou duns meses a outros.

A síndrome premenstrual é un conxunto de síntomas que poden aparecer antes ou durante a regra, como cambios de humor, inchazón, acne ou cansazo. Son diferentes en cada persoa.

Moitas persoas experimentan dor, molestias ou cólicos durante a menstruación, especialmente nos primeiros días. Aplicar calor na zona ou, incluso, tomar analxésicos pode axudar a aliviar esas molestias. Se a dor é intensa, é recomendable consultalo co persoal sanitario.

A fin da menstruación chega coa menopausa, que adoita ser entre os 45 e 55 anos.

Refírese ao conxunto de cambios que ocorren no corpo dunha nena/muller cando se está a preparar para unha posible fecundación. Dura aproximadamente 4 semanas (28 días), aínda que pode variar entre 3 e 5 semanas. Ao principio é frecuente que os ciclos non sexan regulares. 

Este ciclo divídese en catro fases:

1. Menstruación ou regra (1-5 días aprox.)

Cando o óvulo sen fecundar chega ao ovario, a capa que recobre o útero por dentro (endometrio) despréndese ocasionando o sangue menstrual. A menstruación pode durar de 3 a 7 días nos cales podes experimentar tamén cambios a nivel emocional tales como fatiga, sensibilidade nos senos, cólicos ou alteracións no estado de ánimo (irritabilidade ou sensibilidade emocional).

2. Fase folicular (1-14 días aprox.)

Nos ovarios comezan a madurar varios óvulos, pero só un chegará a completar o proceso.

O endometrio rexenérase e comeza a engrosarse para poder acoller un óvulo fecundado (embrión). Neste momento aumenta a produción de estróxenos, que son unhas hormonas moi importantes na menstruación.

Nesta fase pode experimentarse unha maior enerxía, motivación e vitalidade.

3. Fase de ovulación (día 14 aprox.)

O óvulo maduro é liberado polo ovario e comeza o percorrido ata o útero. Se nese momento hai espermatozoides na trompa de Falopio, pode producirse a fecundación. Por iso, esta fase é a de maior probabilidade de embarazo.

Pode experimentarse un aumento da libido, cambios emocionais intensos e alteracións no fluxo vaxinal.

4. Fase lútea (15-28 días aprox.)

O óvulo chega ao útero.

Se non é fecundado, o corpo deixa de producir certas hormonas e o endometrio empeza a deteriorarse e despréndese ocasionando un novo sangrado, reiniciando así o ciclo menstrual.
Se o óvulo é fecundado alóxase na parede do útero e comeza a desenvolverse o embrión, sen producir o sangrado ata completar todo o proceso de embarazo.
Nesta fase lútea poden aparecer unha maior sensibilidade dos seos, cambios na pel e maior cansazo.

Nos dispositivos electrónicos que adoitas utilizar, como teléfonos móbiles, reloxos intelixentes ou tabletas, existen aplicacións que veñen instaladas, ou tamén dispoñibles para descargar de forma gratuíta, coas que podes levar o rexistro do teu período menstrual. 

É importante saber a data da túa última regra, a duración e características do sangrado, coñecer se o teu ciclo é regular mes a mes ou irregular. É necesario poder contestar a estas preguntas nunha consulta médica ou ser quen de detectar posibles alteracións do teu ciclo e, se así o consideras, acudir a un/ha especialista.