A programación informática non necesariamente se desenvolve de forma exclusiva nunha computadora. Moitos programas que creamos son para interactuar co exterior. O caso máis evidente é a entrada de texto por medio do teclado, que non é máis que un dispositivo de comunicación humana coa computadora. O mesmo con accións táctiles en tabletas, móbiles ou ordenadores que o permitan. A entrada de sons mediante micrófonos, ou gravacións que se introducen no sistema,…

Polo tanto no programa temos instrucións que permiten e solicitan a entrada de información dende o exterior. Tamén haberá instrucións que envíen información cara o exterior: en pantalla, con sons,…

Podemos ir máis aló e achegarnos a unha interacción maior con dispositivos físicos. Estariamos no mundo dos automatismos ou da robótica. A programación permitiría a administración de dispositivos automáticos e robots. Un dispositivo automático é aquel que pode ter unha entrada de información dende o exterior mediante sensores, e que pode emitir ordes cara a exterior; todo de acordo ao programa informático. Por exemplo: o control domótico de diversas funcións nos fogares, o control de semáforos, de iluminación, e moitos exemplos máis.

No caso da robótica, o que temos son programas que determinan o comportamento de dispositivos de hardware con funcións de certa autonomía. Un robot non pensa, pero o programamos para que realice certas accións ante determinados estímulos. Precisamos para conectar o noso programa co robot un dispositivo de hardware denominado tarxeta controladora. Esta tarxeta, que ás veces forma parte do propio dispositivo robot, conectarase mediante algún medio á computadora para recibir o programa, inda que despois de programado pode actuar de forma autónoma. Cada vez atopamos con máis frecuencia máis robots, dende o ámbito doméstico ata o industrial. Cando se crea un robot que tenta imitar o comportamento humano denomínase androide.

anarres en Openclipart. Eight little robots (CC0)