5. Glosario

A

• Amnistía Internacional

Organización non gobernamental fundada en 1961 polo avogado británico Peter Beneson. O seu labor consiste na protección internacional dos dereitos humanos plasmados na Declaración Universal dos Dereitos Humanos de 1948.

C

• Competencias

Funcións de poder que lle corresponden a un organismo político ou administrativo.

D

• Diplomacia

Servizo dos estados que se encarga das relacións internacionais.

E

• Estado

Organización política e administrativa que exerce o poder sobre as persoas que habitan nun territorio concreto.

F

• Función executiva

Función do Goberno que consiste en dirixir a Administración e ocuparse dos actos que día a día afectan o funcionamento xeral do Estado.

G

• Golpe de estado

Toma violenta do poder vixente nun país, xeralmente por forzas militares, para instaurar un réxime autoritario.

I

• Imperio da lei

Obriga que teñen os xuíces e maxistrados de facer cumprir a Constitución e as demais leis.

L

• Lexitimación

Aceptación dos sometidos para que as obrigas que impón o poder sexan obedecidas sen ter que recorrer á violencia. Por exemplo, no Antigo Réxime, a lexitimidade baseábase na crenza de que o poder do rei lle era outorgado por Deus; actualmente, nos réximes democráticos, baséase no concepto de soberanía popular (o poder reside no pobo).

N

• Nacionalidade histórica

Nome que se lles dá ás comunidades autónomas de Cataluña, o País Vasco e Galicia, porque durante a II República tiveron un estatuto de autonomía aprobado ou en trámites de aprobación.

P

• Principio de subsidiaridade

Expresión que significa que todo o que poida resolver o municipio non o faga a comunidade autónoma, e todo o que poida resolver a comunidade autónoma, non o faga o Goberno de España.

• Progresividade

Que un sistema de impostos é progresivo significa que pagarán máis os que máis teñan e gañen, e en proporción á súa riqueza e renda.

• Proxección exterior

Política destinada a mellorar a integración, os intercambios económicos e culturais e as comunicacións con todos os países, en especial os do contorno europeo e americano, no contexto dun mundo globalizado.

R

• Referendo

Consulta electoral para afirmar ou negar unha lei ou unha medida.

• Reformismo

Doutrina política que se basea na idea de que a transformación da sociedade pode facerse a través de reformas das leis, sen ter que recorrer á revolución.

T

• Transición

Período que vai desde a morte de Franco ata o inicio da democracia.