5. Glosario

A

• Arancel

Imposto que deben pagar os produtos importados ao atravesaren as fronteiras dun Estado.

B

• Bipolarización

División do mundo en dous bloques ideolóxica, política e economicamente antagónicos, liderado cada un deles polos EE UU e a URSS.

C

• Coexistencia pacífica

Diminución da tensión entre os EEUU e a URSS, a través do diálogo, a negociación e a non intervención nos asuntos internos do outro bloque.

• Colectivización

Feito polo que, a través da nacionalización, a propiedade se pon ao servizo de toda a sociedade.

D

• Dereito de veto

Facultade que ten calquera institución de poder a opoñerse a que entre en vigor unha lei aprobada por unha asemblea.

• Dereitos civís

Son os dereitos e liberdades propios das sociedades democráticas.

• Deslocalización

Práctica que levan a cabo as multinacionais, consistente en trasladar as fábricas dos países desenvolvidos a países do Terceiro Mundo para aproveitarse dos menores custos.

E

• Equilibrio do terror

Situación á que chegaron as dúas superpotencias, logo de que en 1949 a URSS conseguise fabricar a bomba atómica. Este feito impediu o estoupido dunha guerra entre ambas potencias, porque sabían que de producirse perigaría a supervivencia do planeta.

H

• Habeas corpus

É unha figura xurídica creada en Inglaterra no século XVII para que ningunha persoa sexa detida nin arrestada sen motivo razoado.

I

• Inflación

Fenómeno económico que se manifesta cunha suba xeneralizada dos prezos.

L

• Logotipo

Forma ou figura que distingue unha marca, unha empresa ou un produto.

N

• Neocolonialismo

Situación na que se atopan actualmente as antigas colonias, caracterizada porque a súa economía permanece controlada e subordinada aos intereses económicos das multinacionais das antigas potencias ou doutras novas, que a súa vez inflúen ou mesmo determinan a política interna deses países.

• Nacionalización

Transferencia da propiedade privada ao Estado.

• Nomenklatura

Conxunto dos dirixentes do partido comunista e do Estado soviético

X

• Xeoestratexia

É un concepto que fai referencia a como se realiza o reparto do poder nun territorio concreto ou a escala mundial.