Saltar navegación

2.3.3 Os grandes desafíos da actualidade

 

  • Alto crecemento da poboación: nos países subdesenvolvidos é unha das dificultades máis importantes con que se atopan os países pobres para resolver os seus problemas, aínda que se están aplicando algunhas medidas para o seu control, sobre todo na China, cuxa poboación representa o 20 % da total mundial; e en Iberoamérica está a estabilizarse.

  • Produción de alimentos: é unha cuestión intimamente relacionada coa anterior. Non obstante, a produción mundial de alimentos é suficiente para alimentar a actual poboación mundial e aínda máis. Pero a falta de concienciación, os intereses económicos e a indiferenza ante a inxustiza impiden unha distribución correcta dos recursos. A fame é a causante de máis mortos que as guerras.

Co actual ritmo de crecemento da poboación, será necesario incrementar a produción de alimentos nun 60 % nos vindeiros 20 anos. Non obstante, cos 2.300 millóns de dólares diarios que se gastan en armamento habería recursos máis que suficientes para erradicar a fame do planeta

Hai un control cada vez maior sobre os alimentos por parte das grandes transnacionais, que son as que deciden sobre os recursos alimentarios no planeta.

Pérez Esquivel, Adolfo. Premio Nobel da Paz

.

  • Biodiversidade: é dicir, o mantemento do número de especies animais e vexetais que existen no planeta. Nas últimas décadas perdéronse o 45 % dos bosques, o 25 % dos mamíferos e o 33 % dos anfibios. Como dato que resume esta situación, podemos citar que tan só 30 produtos naturais proporcionan o 90 % das quilocalorías que necesita a humanidade.

  • Falta de liberdade: constitúe unha das lacras humanas máis magoantes dos nosos tempos. Aínda que máis da metade dos Estados se declaran democráticos, moitos deles o son a medias; outros carecen de institucións propias do sistema democrático; noutros a corrupción, as loitas civís e os intereses económicos limitan ou mesmo imposibilitan a aplicación do modelo.

Baixo o pretexto de protexer a democracia fronte ao terrorismo, desde o 11 de setembro de 2001, en países de tradición democrática como EEUU, ditáronse leis antidemocráticas que permiten a tortura e mesmo a suspensión do hábeas corpus e os cárceres secretos.

En resumo, só a quinta parte da poboación mundial goza de plenos dereitos e liberdades; dúas quintas partes vive en Estados parcialmente libres, e outras dúas quintas en países onde non se respectan os dereitos políticos nin as liberdades.

(…) Mentres a sociedade civil progresa adecuadamente no recoñecemento da igualdade e dos dereitos humanos, (…) os Estados e as organizacións internacionais están creando unha dura coiraza que, baixo o amable aspecto da protección da orde mundial e a loita contra o terror fan o que lles parece cos dereitos e costumes que ninguén puxo en dúbida desde a Revolución Francesa.

Os países máis avanzados establecen leis de defensa da democracia que son contrarias aos dereitos humanos. A pena de morte aplícase con profusión, mesmo en países democráticos, sen que os organismos internacionais, a Igrexa e os líderes estatais se mollen contra ela. O centro de Guantánamo demostra a quen queira velo que a violencia e o fascismo de Estado seguen vixentes na gran nación americana e nos seus principais aliados da Unión Europea (…). E as cerimonias que se lles fan ás ditaduras como China, en nome da pura economía, demostran á súa vez que os dereitos humanos distan moito de ser a primeira preocupación no goberno do mundo.

Se a isto engadimos a fame, a ditadura, a falta de auga, a destrución do planeta, o espolio material e intelectual do Terceiro Mundo, a pésima distribución da saúde e a vivenda e o crecente recurso ás guerras como arma de política económica, veremos que as maiores ameazas aos dereitos humanos veñen hoxe dos Estados máis poderosos, que xestionan o mundo, máis ca nunca, aplicando a lei do embude.

Barreiro Rivas, Xosé Luís. La Voz de Galicia, 11 de decembro de 2008

Actividades propostas

S25. A quen afecta máis o problema da superpoboación?

    • Que medidas se toman para corrixilo?

S26. Cales son as causas que impiden unha dispoñibilidade suficiente de alimentos para toda a poboación mundial?

    • Que papel xogan neste problema as multinacionais da alimentación, segundo Adolfo Pérez Esquivel?

S27. Segundo o texto de Xosé Luís Barreiro Rivas:

    • Con que desculpas os Estados democráticos asoballan os dereitos humanos?

    • Que prácticas aplicadas polos gobernos dos países democráticos atentan contra estes dereitos?

    • Que outras situacións denuncia o autor como graves atentados contra os dereitos humanos?

    • Quen son os responsables desta situación?

Licenciado baixo a Creative Commons Attribution Non-commercial Share Alike License 3.0