Saltar navegación

A destrución da atmósfera, das augas e das terras

 

Glosario

Augas residuais

Pictograma dun neno bebendo tachado

Definición:

Son as augas que xa foron usadas polas persoas, nas casas, nas fábricas ou nas granxas. Estas augas levan sucidade ou restos (como xabón, comida, produtos químicos, etc.) e precisan ser tratadas antes de volver á natureza.

Exemplo:

O río que atravesa a cidade está chea de augas residuais.

Capa de ozono

Pictograma da Capa ao redor da terra

Definición:

Parte da atmosfera que contén grandes cantidades de ozono e permite a vida na Terra.

Exemplo:

Coidar a capa de ozono é fundamental para o noso futuro.

Chuvia aceda

Pictograma de Río con peixes mortos

Definición:

Auga precipitada que conten contaminantes de composición aceda.

Exemplo:

A chuvia aceda estragou o curso do río.

Deforestación

Pictograma de Bosque talado

Definición:

Desaparición dos bosques debido á tala, incendios ou accións humanas e non se plantan de novo. Isto é un problema porque desaparecen os bosques, os animais quedan sen fogar e empobrece o chan.

Exemplo:

Os incendios provocan a deforestación dos montes.

Degradación da terra

Pictograma de cultivar

Definición:

 Cando o chan perde a súa calidade e deixa de ser útil para plantar, cultivar ou a vida animai. Isto ocorre por culpa da contaminación, da deforestación ou os malos usos  da terra durante moito tempo.

Exemplo:

A terra que rodea o polígono industrial está moi degrada por mor das verteduras.

Desertización

Pictograma de Chan en risco de desertificación

Definición:

É o proceso no cal, unha zona que antes tiña vexetación (árbores, herba, plantas) se vai convertendo nun deserto, debido a falta de chuvia, da deforestación ou a acción humana.

Exemplo:

O sur da península Ibérica corre grave risco de desertización.

Smog

Paisaxe con smog

Definición:

Contaminación producida ao se mesturar fume con xofre ou nitróxeno -procedente dos emisores contaminantes que queiman combustibles fósiles- coa néboa natural.

Exemplo:

O smog en Londres desapareceu gracias as leis de aire limpo.

Contaminación da atmosfera

A contaminación ten a súa orixe, en gran medida, nas actividades humanas, como a liberación de gases de efecto invernadoiro na atmosfera ou o uso excesivo e indiscriminado dos recursos naturais.

Smog

O smog é unha espesa néboa urbana que se forma a través dunha reacción química cando o fume contaminante se combina coa néboa habitual. Esta mestura, que contén partículas de feluxe e xofre, xorde principalmente pola combustión de carbón e derivados do petróleo, como os usados nos automóbiles. Cando estas substancias interaccionan coa radiación solar, prodúcese gas ozono, que resulta altamente tóxico nas capas inferiores da atmosfera.

Fotografía do Smog sobre Barcelona
 

Choiva Aceda

A choiva aceda prodúcese pola condensación ou precipitación de auga altamente acidificada (< 7 en escala de PH) pola concentración de ións de Hidróxeno (H+), derivada da combustión dos combustibles fósiles. Ten graves consecuencias afectando a biodiversidade das augas continentais e a cobertura vexetal, danando as raíces e fana máis propensa a enfermidades e pragas. A acidez da auga fíltrase ás augas subterráneas, impedindo o consumo humano. Ademais ten un efecto sobre o patrimonio histórico ao corroer construcións, especialmente as de mármore.

Fotografía dunha Gárgola danada por choiva aceda.

Efecto Invernadoiro

Trátase dun fenómeno da natureza polo que os gases de efecto invernadoiro absorben a radiación térmica reflectida pola Terra aumentando de este xeito a súa temperatura que de outro xeito sería de - 18 °C. Porén, este fenómeno natural que facilita a vida na Terra viuse agravado por mor das emisións multitudinarias de dióxido de carbono (ata superar os valores de 300–400 partes por millón de volume) que provocou un aumento repentino das temperaturas e dos océanos (en torno a 1.5 °C – 2 °C xa no presente).

Imaxe explicativa do Efecto Invernadoiro

Capa de Ozono

Esta capa se atopa  na estratosfera acumula o 90% de este gas e ten grande importancia para a vida por filtrar os raios ultravioletas. Os gases CFC, gases densos frigoríficos e propelentes son o seu principal inimigo.  Estes quintuplicáronse durante o s. XX, dando lugar ao chamado Buraco da Capa de Ozono que é unha redución anormal da densidade de este gas, resultando daniño para a saúde –ollos, pulmóns, …– e a vexetación.

Coñecido o problema dende os anos 70, o protocolo de Montreal en 1987 supuxo unha firme redución de emisións de CFC, iniciando a recuperación, aínda incompleta, da capa de ozono.

Comparación entre 1979 e 2008 do burato da capa de ozono
 

Lectura facilitada

O smog é unha néboa nas cidades provocada pola contaminación.

A choiva aceda está causada pola combustión de petróleo e carbón.

A choiva aceda provoca a destrución da flora e do patrimonio histórico.

O efecto invernadoiro é un proceso natural que causa o incremento da temperatura do planeta.

Porén, a actividade industrial e o transporte liberan gases de efecto invernadoiro,

o que fai que a temperatura da Terra se eleve máis alá do que sería propio sen a intervención humana.

O ozono é un gas que impide a chegada de raios ultravioletas á terra.

Determinados gases emitidos polo home fan que desapareza parte do ozono da atmosfera.

A diminución da capa de ozono provoca problemas para a saúde e a vexetación.

Pregunta Verdadeiro-Falso

Pregunta 1

O efecto invernadoiro é un fenómeno natural?

Pregunta 2

A capa de Ozono impide que se filtren raios UVA.

Pregunta 3

A expansión das áreas urbanas é unha consecuencia da perda da biodiversidade.

Pregunta 4

A deforestación agrava o problema da erosión.

Contaminación das terras

A contaminación das terras ten tres principais focos:

  • Actividade agraria: fundamentalmente polo uso de fitosanitarios, fertilizantes e puríns.
  • Actividade industrial: verteduras de residuos sen depurar, mareas negras…
  • Actividade urbana: augas residuais e fecais sen depurar.

Información: A contaminación por nitratos

O perigo da desertificación

No fondo, tras tódolos escenarios analizados, o principal cambio que ameaza á natureza e ao ser humano, é a progresiva desertización é a degradación do chan, sobre todo en zonas desérticas, esteparias e subhúmedas [artigo 1 da Convención de Nacións Unidas de Loita contra a Desertificación (CLD)].

A principal medida para atallar esta problemática é a restauración hidrolóxico-forestal, que intenta protexer o chan fronte á erosión e as inundacións, tamén inclúe a restauración das zonas danadas por grandes incendios forestais e a elaboración de plans especiais para reducir a desertización e a erosión.

España levou a cabo un gran traballo de repoboación forestal en terras degradadas para frear a desertización. Calcúlase que, nos últimos 150 anos, se repoboaron arredor de 5 millóns de hectáreas, o que representa aproximadamente o 10% do territorio nacional.

Feito con eXeLearning (Nova xanela)