4- As linguas de Europa
En Europa existen linguas de orixe moi diversa e de recoñecemento e usos tamén distintos. É o continente que presenta menor diversidade lingüística, pois das máis de 6.000 do mundo, en Europa hai 239, isto é, menos do 4%.
Corenta millóns de europeos falan un idioma que non é oficial. En Europa Occidental pasan de trinta as linguas de diferentes comunidades históricas que podemos considerar linguas minorizadas, sometidas á presión doutra ou doutras linguas hexemónicas ou dominantes. As máis delas son linguas sen estado; é dicir, que non representan a ningún estado (como no caso do galego, o estado é o estado español e a lingua representante na UE é o castelán); se ben non faltan exemplos de linguas que son oficiais do estado, pero que na práctica padecen a presión constante da lingua hexemónica (ex: o gaélico -en Irlanda sofre a presión do inglés-, o luxemburgués en Luxemburgo ou o maltés en Malta, que tamén ten que competir co inglés).
Algunhas linguas minorizadas europeas son as seguintes: aranés, asturiano, bretón, catalán, frisón, galego, lapón, maltés, occitano, valón, éuscaro, etc.