1- A diversidade lingüística

Cantas linguas se falan no mundo?

Cantas son as linguas da Península Ibérica?

No mito da "Torre de Babel" Deus confunde os homes para que falen linguas diferentes; así non se entenden e non chegan a construír a ambiciosa torre coa que querían alcanzar o ceo. Desde cando se comeza a considerar a variedade lingüística unha riqueza e non un castigo?

Cal era a lingua franca na Idade Media?

Cal é o seu equivalente actual?

Como podemos saber cal será a lingua que fale un maior número de persoas dentro de cen anos?

Que porcentaxe de probabilidade temos de acertar?

No mundo fálanse arredor de 6.900 linguas. Algo menos do 50% delas teñen menos de 10.000 habitantes. Outro 25% non chegan aos 1000. Só o 5% pasa do millón de falantes. Neste selecto grupo está a nosa lingua, o galego.

Segundo a UNESCO, un 50% das linguas está en perigo de extinción debido á globalización. Esta institución pretende concienciarnos do importante que é para o mundo conservar o seu patrimonio lingüístico. Tamén a ONU asegura que o multilingüismo promove a unidade na diversidade e no entendemento internacional, e recoñece a importancia de protexer as distintas linguas, o que equivale a protexer as diferentes culturas e promovelas.

O multilingüísmo considérase hoxe un valor de mercado: comprender e falar diferentes linguas constitúe unha oportunidade no mundo laboral, tamén en Galicia. A familia foi tradicionalmente a principal responsable da transmisión das linguas. Hoxe os medios de comunicación, a escola, a convivencia con falantes doutras linguas etc. son axentes tamén fundamentais na nosa sociedade. A lingua da casa complétase así co contacto con, cando menos, outra lingua. É unha oportunidade para familiarizármonos con varios idiomas desde pequenos. O coñecemento de máis dunha lingua supón contar con máis referencias para chegarmos a aprender outras.

Manter a diversidade das linguas do mundo é unha maneira de garantir a subsistencia da diversidade das culturas.