2.1.1 Utilidade da estatística

Na actualidade a estatística enténdese como un método na toma de decisións, de aí a importancia en multitude de estudos científicos de todas as ramas do saber:

• Como decidir se un novo produto comercial terá éxito?

• Inflúe o IPC na taxa de desemprego?

• Que diría un sociólogo sobre a intención do voto, despois de analizar unha enquisa?

• A partir dun estudo sobre o crecemento da poboación dun pais, poderá un experto en xeografía humana calcular a poboación do ano 2050?

• Cales serán as necesidades escolares dun país para os próximos cinco anos?

Moitas destas preguntas teñen a súa resposta grazas á estatística, xa que a través de procedementos de inferencia estatística se pode responder ás cuestións formuladas cunha marxe de erro prefixado.

Divisións da estatística

• Estatística descritiva ou dedutiva: trata do reconto, a ordenación e a clasificación dos datos obtidos das observacións. Constrúense táboas e represéntanse en gráficos, que permiten simplificar en grande medida a complexidade dos datos que interveñen na distribución. A partir dos datos obtéñense os parámetros estatísticos que caracterizan a distribución. Esta parte da estatística limitase a realizar deducións directamente a partir dos datos e os parámetros obtidos.

• Estatística inferencial ou indutiva: formula e resolve o problema de establecer previsións e deducións xerais sobre unha poboación a partir resultados obtidos dunha mostra. Utiliza resultados obtidos mediante a estatística descritiva e apóiase fortemente no cálculo de probabilidades.

Actividade proposta

Quérese facer unha enquisa para estudar as afeccións da xente nova á lectura. Diga, xustificadamente cales das preguntas seguintes lle parecen razoables e cales non:

a.- Di cale son as túas lecturas preferidas

b.- Dos xéneros literarios seguintes, sinala os qu eliches máis dunha hora o último mes

• Novela
• Historia
• Poesía
• Teatro
• Filosofía
• Biografía
• Cómic

c.- Les xornais? Se é asi, de que tipo?

d.- A cal ou cals das seguintes publicacións periódicas dedicas máis de dúas horas semanais:

• Xornais de actualidade política
• Xornais de novas deportivas
• Revistas de contidos científico
• Revistas do corazón
• Outros (indíquese cales)