Saltar navegación

1. Iniciando a montaxe

 

Glosario

Dicionario

Banner pequeno de cREAgal

Definición:

Conxunto de palabras xeralmente organizadas de maneira alfabética e definidas atendendo aos distintos campos do saber.

Exemplo:

Xiana pescuda no dicionario o termo 'decodificar'.

Diversidade lingüística

Clase de idiomas

Definición:

Conxunto de linguas que se poden atopar tanto como nunha área específica como a nivel mundial.

Exemplo:

Na aula existe unha clara diversidade lingüística: Xoán fala galego, Lois castelán, Xinyi chinés e Bruna brasileiro.

Prexuízo

Ter unha idea

Definición:

 Idea que se ten de algo ou alguén sen coñecemento previo da súa realidade.

Exemplo:

Que as mulleres non son científicas é un prexuízo.

Propiedades textuais

Cumprimento

Definición:

 Conxunto de elementos que debe cumprir un texto para ter sentido pleno.

Exemplo:

O enunciado ‘’A nena están cansas’’ non cumpre as propiedades textuais.

Xénero teatral

Teatro

Definición:

 Forma literaria que ten como fin último a representación.

Exemplo:

A obra Os vellos non deben de namorarse pertence ao xénero teatral.

Proposta de reto

Realizador de televisión

PRECÍSASE PERSOAL PARA CREAR UN PROGRAMA TELEVISIVO

Queres comezar a túa andaina no mundo televisivo? Esta é a túa oportunidade, precisamos de guionistas, presentadores e presentadoras e reporteiros e reporteiras. Se algunha vez estiveches interesado ou interesada na gran pantalla, mais nunca te atreviches a dar o salto, chegou a túa hora, non dubides en formar parte do noso equipo.

Ademais, non é preciso ter experiencia, aínda que se coñeces o mundo do teatro vaiche ser moito máis doado desenvolver a túa función! Iso si, dous requisitos son indispensables:

  • Que sexas unha persoa colaborativa e saibas traballar en equipo, pois cada programa é unha gran creación colectiva na que formamos unha gran familia.
  • Que empregues a lingua galega, xa que o programa se vai desenvolver integramente en galego, tanto para a creación do guión como durante a realización do programa. 

Se te presentas a este posto de traballo vas ter que afrontar un gran desafío, pois mediante este programa pretendemos dar a coñecer ao mundo diversos contidos a través do humor, a información e un longo etcétera.

Aceptas o reto?

Lectura facilitada

PRECÍSASE PERSOAL PARA UN PROGRAMA DE TELEVISIÓN

Queres traballar na televisión?

Buscamos persoas para un programa!  Necesitamos:

- Guionistas.

- Presentadores e presentadoras.

- Reporteiros e reporteiras.

Non é necesario ter experiencia. Se che gusta o teatro, vaiche resultar máis fácil!

Requisitos:

- Traballar ben en equipo.

- Falar galego.

O programa falará de moitos temas, como humor e información.

Atréveste a participar?

Cal é a meta do noso reto?

Para chegar a realizar o teu propio programa de televisón vas ter que....

  • Crear un guión de forma cooperativa coas túas compañeiras e compañeiros.
  • Recadar a información necesaria sobre o tema que se vai tratar no programa.
  • Poñer en marcha o espazo no que se vai levar a cabo a rodaxe.
  • Transformarte nunha actriz ou actor e chegar á emisión do programa.

Lectura facilitada

COMO FACER O TEU PROGRAMA DE TELEVISIÓN?

Para crear o teu programa, terás que:

- Escribir un guión en equipo.

- Buscar información sobre o tema.

- Prepar o lugar da gravación.

- Actúa como actriz ou actor e participa na emisión.

Agora si, estás listo ou lista par comezar!

Que pasos temos que seguir no noso reto?

Imos construír o noso reto pasiño a pasiño:

  • 1º paso: realización dos diálogos do guión.
  • 2º paso: realización das acotacións do guión.
  • 3º paso: corrección do guión.
  • 4º paso: reparto dos papeis dos personaxes.
  • 5º paso: ensaio sen caracterización.
  • 6º paso: ensaio con caracterización.
  • 7º paso: realización do programa no salón de actos a última semana do REA.

Que acadaremos co noso reto?

Meta

Unha vez que teñas o reto, isto é, o programa de televisión realizado serás capaz de:

    1. Identificar a diversidade lingüística das variedades dialectais do galego.

    2. Identificar e desterrar prexuízos lingüísticos e usos discursivos discriminatorios.

    3. Planificar e realizar exposicións orais e escritas de diferentes ámbitos, tendo en conta as propiedades textuais.

4. Coñecer e identificar as principais funcións sintácticas.

5. Explicar os diferentes procedementos de formación de palabras.

6. Detectar e corrixir castelanismos tanto en textos orais como escritos mediante o uso do dicionario.

7. Identificar as principais características do xénero teatral tanto en textos galegos como lusófonos.

Lectura facilitada

QUE APRENDERÁS DESPOIS DE FACER O PROGRAMA?

Cando remates este reto, serás capaz de:

  1. Recoñecer os diferentes dialectos do galego.
  2. Identificar e evitar prexuízos sobre a lingua.
  3. Falar e escribir ben en diferentes situacións.
  4. Comprender como funcionan as frases.
  5. Saber como se crean as palabras.
  6. Corrixir castelanismos con axuda do dicionario.
  7. Coñecer as características do teatro en galego e en portugués.

Agora xa estás preparado ou preparada!

Creado con eXeLearning (Ventana nueva)