Elsie Widdowson naceu en Inglaterra no ano 1906. De pequena, estudou nun colexio onde a animaron a seguir o camiño da ciencia. Máis adiante, estudou Química en Londres e fixo o doutoramento estudando as mazás. Ao principio, traballou como química e fisióloga, pero logo interesouse pola nutrición, un tema pouco coñecido daquela. En 1933, coñece ao doutor Robert McCance nun hospital. Os dous comezaron a traballar xuntos e fixéronse amigos. Xuntos descubriron que moitas táboas de alimentos tiñan erros e decidiron estudalos ben para mellorar a alimentación da xente. Durante a Segunda Guerra Mundial, como había pouca comida en Inglaterra, estudaron como manter a saúde das persoas con moi pouca comida. Para iso, fixeron experimentos en si mesmos, comendo só pan, patacas e coles durante meses. Así souberon que era importante engadir calcio e outras vitaminas aos alimentos. Grazas ao seu traballo, o goberno mellorou as dietas da poboación durante a guerra. Despois da guerra, axudaron a persoas que sufriran moita fame nos campos de concentración e en países ocupados. Tamén estudaron como afecta a falta de comida aos nenos e comprobaron que unha mala alimentación de pequenos causa problemas para toda a vida. Elsie tamén estudou o leite materno e o leite artificial, e grazas a ela melloráronse as fórmulas de leite para bebés. Foi moi recoñecida: presidiu sociedades científicas, recibiu premios e honras importantes. Era unha muller moi seria no seu traballo, pero tamén moi amable coas persoas novas que traballaban con ela. Non tivo fillos, pero era como unha avoa para os fillos dos seus compañeiros. Elsie Widdowson morreu en 2000, deixando un legado moi importante na nutrición e na saúde das persoas.