Definición

As drogas son substancias  sintéticas ou naturais que actúan sobre o noso sistema nervioso provocando cambios na forma en que funciona o noso corpo e a nosa mente.

Afectan á nosa conduta, estado de ánimo e percepción da realidade.

Algunhas son legais, como o tabaco e o alcohol, e outras son ilegais, como a cocaína ou o cannabis.

Tipos de drogas

• Drogas legais
  Pódese vendelas e compralas, como o tabaco e o alcohol.
• Drogas ilegais
  Está prohibido vendelas e consumilas, como a heroína e o éxtase.
• Drogas naturais
  Proveñen de plantas, como a marihuana.
• Drogas de síntese
  Fabrícanse en laboratorios, como as pastillas de éxtase. Ás veces non se coñece a súa composición, polo que son moi perigosas.

Se as drogas son daniñas, por que hai drogas legais? 

As drogas legais, como o alcohol e o tabaco, permítense porque teñen unha longa historia de consumo na sociedade e xeran ingresos a través de impostos.

Ademais, algúns medicamentos que tamén poden ser considerados drogas están regulados porque teñen usos médicos importantes.

Porén, aínda que sexan legais, iso non significa que sexan seguras.

O tabaco e o alcohol causan moitos problemas de saúde, como enfermidades do corazón, cancro ou accidentes.

Por iso, hai leis que regulan a súa venda e consumo, como a idade mínima para compralas.

Legal ou ilegal? Cales son os criterios? 

Os criterios para decidir se unha droga é legal ou ilegal dependen de varios factores, que varían segundo o país. Algúns dos máis importantes son:

• Efectos sobre a saúde. Se unha substancia causa danos graves á saúde, é máis probable que sexa ilegal. Por exemplo, drogas como a heroína ou o éxtase están prohibidas porque poden ser moi perigosas e causar adicción rapidamente.
• Uso medicinal. Algunhas drogas poden ser perigosas, pero teñen usos médicos importantes, como a morfina, que se usa para tratar a dor intensa en hospitais. Por iso, están reguladas pero non prohibidas.
• Historia e cultura. Drogas como o alcohol e o tabaco foron consumidas durante séculos en moitas sociedades, o que fixo máis difícil a súa prohibición total. En cambio, outras drogas, aínda que tamén foron usadas historicamente, foron prohibidas por decisións políticas ou sociais.
• Impacto social e económico . O goberno tamén considera o impacto que tería prohibir ou legalizar unha droga. Por exemplo, o tabaco e o alcohol xeran moitos ingresos en impostos, pero tamén teñen custos para o sistema de saúde.
• Posibilidade de abuso e dependencia. Cando unha substancia crea unha gran adicción ou fai que a xente perda o control sobre o seu consumo, as leis tenden a ser máis estritas.

Aquí  algúns exemplos de drogas que foron usadas historicamente pero que foron prohibidas por razóns políticas ou sociais:

O opio en China
Durante séculos, o opio era utilizado en China con fins medicinais e recreativos. Pero no século XIX, debido á crise social provocada polo seu abuso e á Guerra do Opio contra Gran Bretaña, o goberno chinés prohibiuno para tentar frear a súa expansión.

A cocaína
A finais do século XIX e principios do XX, a cocaína era usada en remedios para a dor e mesmo en refrescos como a Coca-Cola. Co tempo, descubriuse o seu alto potencial adictivo e prohibiuse en moitos países.

O cannabis
Durante moitos anos, en distintas culturas utilizouse o cannabis con fins medicinais e recreativos. Porén, no século XX foi prohibido en moitos países, en parte por presións políticas e campañas que o relacionaban con delincuencia e problemas sociais. Actualmente, algúns países están a legalizalo de novo para uso medicinal e recreativo.

O LSD
Nos anos 50 e 60 estudouse o LSD para tratar problemas psicolóxicos, pero debido ao seu vínculo co movemento contracultural da época, os gobernos prohibírono, argumentando que tiña efectos perigosos. 

Os cogomelos alucinóxenos
En moitas culturas indíxenas utilizáronse durante séculos en rituais relixiosos. Porén, os gobernos de moitos países clasificáronos como drogas ilegais, aínda que hoxe en día volven ser estudados para tratar depresión e ansiedade.

 Estes casos mostran que a legalidade das drogas non sempre depende só dos seus efectos, senón tamén de factores culturais, políticos e sociais. 

Que efectos producen no noso corpo?

As drogas poden afectar o corpo e a mente de diferentes maneiras:

• Poden facer que te sintas relaxado ou con moita enerxía.
• Poden causar problemas para pensar, lembrar ou tomar boas decisóns.
• Poden provocar enfermidades ou accidentes graves.
• Se se consumen moitas veces, poden crear unha dependencia.

 
Trastornos que provocan as drogas

• Tolerancia: Cando o corpo se acostuma á droga e necesita cada vez máis para sentir o mesmo efecto.
• Síndrome de abstinencia: Cando unha persoa que consome drogas con frecuencia deixa de facelo e sente malestar, ansiedade ou dor.
• Abuso: Cando alguén usa drogas sen control e pon en risco a súa saúde.
• Dependencia: Cando alguén non pode deixar de consumir unha droga porque o seu corpo e a súa mente a necesitan.

Como afectan as drogas aos demais?
As drogas non só afectan a quen as consume, senón también á súa familia e amigos. O consumo pode causar problemas en casa, na escola ou coas amizades. Ademais, alguén baixo os efectos das drogas pode poñer en perigo a outras persoas, por exemplo, conducindo ou sendo agresivo.

Non te deixes manipular, infórmate ben.

Coñece os efectos reais das drogas e os seus riscos.

Moitas ideas que escoitamos sobre as drogas non son certas. É importante falar con amigos, familia e profesores sobre este tema. Tamén podes buscar información en libros e manuais.

Non deixes que os demáis che obriguen a consumir.

Os amigos son importantes, pero ti decides que queres facer. Tes dereito a elixir o que che gusta e o que non, o que é bo para ti e o que non.

Se non queres consumir drogas, dí que non e mantente firme. Do mesmo xeito que ti respectas as decisións dos teus amigos, eles deben respectar as túas.

Mellora as túas relacións cos demáis.

Ás veces, podes sentir vergoña ou inseguridade ao falar con outras persoas.

Pero non necesitas as drogas para mellorar as túas relacións. É mellor ser ti mesmo/a, expresar as túas ideas e sentimentos e animarte a falar con xente nova.

Se te sintes raro/a ao estar con alguén que non coñeces, non te preocupes, é algo normal. O importante é dar o primeiro paso.

Quérete e valórate.

Ser adolescente ou mozo/a pode ser complicado.

Ás veces non nos gusta o noso corpo ou a nosa forma de ser. Pero debes saber que es unha persoa única e valiosa.

Tes moitas habilidades e podes superar os retos que se presenten. Se confías en ti, podes conseguir moitas cousas.

Aprende a tomar boas decisións.

Ti es libre para decidir o que queres facer na vida.

Ás veces, tomar unha decisión pode ser difícil. Para axudarte, podes seguir estes pasos:

• Fai unha lista coas opcións que tes.
• Escribe as vantaxes e desvantaxes de cada opción.
• Pensa cal é a mellor para ti.
• Toma unha decisión e mantente firme nela.
• Ninguén pode saber con certeza se unha decisión é a mellor ata despois de tomala. O importante é actuar con responsabilidade.

Aproveita o teu tempo libre de forma saudable.

Existen moitas formas de divertirse e coñecer xente sen recorrer ás drogas.

Podes practicar un deporte, ler libros interesantes, colaborar cunha ONG, participar en proxectos solidarios, formar parte dunha asociación xuvenil, cultural ou deportiva, ou apoiar unha asociación ecoloxista.

Todas estas actividades axudaranche a crecer como persoa e a coñecer xente interesante coma ti.