Como era de esperar os nosos amigos/as non se ían quedar con dúbidas sobre o tema, así que puxéronse a indagar un pouco máis sobre onde se podían atopar estes símbolos en Galicia e que era iso dos xacementos castrexos nos que estaba a traballar o tío de Aldara. Empezaron a axexar novamente en internet e descubriron que eran moitos os lugares que podían escoller para visitar un xacemento castrexo en Galicia, algúns máis preto da súas casas que outros. De feito non só existían este tipo de poboamentos en Galicia senón que tamén os había no norte de Portugal e outras zonas da Península  Ibérica.

Atopáronse pegadas dunha cultura que habitou nos castros desde finais da Idade de Bronce (século IX/VIII a. C.) ata o século II d. C. Non está clara a data exacta da súa orixe, sobre o fin do seu período non hai dúbida: tivo lugar coa chegada dos romanos no século II d. C. Desenvolveuse durante a Idade do Ferro . O estudo e investigación da cultura  castrexa conta con máis dun século de evolución. Iniciada por Martins  Sarmento a finais do século  XIX, foi continuada pola  Sociedade Martins  Sarmento e máis tarde José  Leite de  Vasconcelos que establece a  colaboración luso-galega en materia de cultura  castrexa.

Nas súas investigacións descubriron que o número de castros clasificados en Galicia superan os 3.000, aínda que só uns centos se atopan visibles en parte. Neste mapa podedes ver a localización dalgúns castros, se premes nel poderás navegar por google maps con tódalas súas funcións.