7. Glosario

A

• Anexar

Xuntar ou engadir a outra cousa que se considera como principal.

• Aplicación informática

Tipo de programa informático, deseñado como unha ferramenta, que lle permite ao usuario realizar unha ou varias tarefas.

• Antivirus

Aplicación ou grupo de aplicacións dedicadas á prevención, procura, detección e eliminación dos programas malignos nos sistemas informáticos.

• Atmosfera

Capa gasosa que envolve a Terra.

B

• Biosfera

Capa da Terra formada por todos os seres vivos do planeta.

C

• Cartafol

En informática, é o lugar virtual en que se gardan ficheiros para unha mellor clasificación.

• Cometa

Corpo celeste formado por xeo e rochas que se move arredor do Sol describindo órbitas moi elípticas.

• Condensar

Facer máis denso, concentrar.

• Condicións fisicoquímicas

Parámetros de temperatura, presenza de auga líquida, presenza de atmosfera filtradora e combinación de elementos químicos que permitiron (ou orixinaron) a aparición de vida na Terra.

• Conexión

Contacto entre dúas partes dun sistema. En informática, medio polo que se establece comunicación entre dous equipamentos informáticos.

• Configurar

Darlle forma a algo. En informática, establecer as características dunha aplicación ou dun equipamento informático.

• Contraer

Diminuír o volume.

• Copiar

En informática, función de edición que permite gardar nunha memoria temporal un obxecto, ou parte del, con posibilidade de ser pegado posteriormente noutro lugar.

F

• Ficheiro

En informática, lugar virtual en que se garda información (texto, imaxe, etc.).

H

• Hipertexto

Texto empregado en soporte informático que permite o acceso secuencial a documentos relacionados entre si. Pásase duns documentos a outros por medio de ligazóns.

I

• Icona

Símbolo que identifica un elemento informático: ficheiro, cartafol, aplicación, ...

O

• Órbita

Curva pechada descrita por todo astro que gravita arredor doutro.

P

• Pegar

En informática, inserir un obxecto previamente copiado (texto, imaxe, ...) dentro doutro.

S

• Satélite

Astro que xira arredor dun planeta.

• Servidor

En informática, equipamento informático que forma parte dunha rede e que proporciona servizos a outros equipamentos denominados clientes.