A estas alturas, seguro que xa es quen de distinguir os deportes colectivos dos deportes de adversario ou individuais: os colectivos son todos aqueles nos que hai que formar equipos de varias persoas para poder xogar.

Dentro dos deportes de equipo (colectivos), podemos distinguir á súa vez entre deportes alternativos e deportes convencionais. Os alternativos son eses novos deportes que buscan modificar o regulamento tradicional para fomentar a igualdade e a participación, sendo moitas veces pouco coñecidos (como o twincon, o floorball ou o ultimate). Pola súa banda, os convencionais son esas disciplinas que practicamente todo o mundo coñece e que levan con nós moitos anos (o fútbol, o baloncesto, o rugby...).

Porén, tanto os deportes alternativos como os convencionais, polo feito de seren deportes de equipo, seguen unha serie de características comúns á hora de entender como se xogan. En todos eles podemos distinguir tres fases no xogo onde, en función de se es do equipo atacante ou do defensor, deberás realizar unha acción ou outra:

• Situacións de conservación do móbil (ataque) ou recuperación (defensa).
• Situacións de progresión e avance (ataque) ou temporalización (defensa).
• Situacións de finalización (ataque) ou bloqueo da finalización (defensa).

Todas estas situacións, adaptadas á normativa específica de cada deporte, forman o ADN dos deportes colectivos, é dicir, son a súa esencia.