Definición:
É un instrumento de avaliación que se utiliza para medir o desempeño dos/as estudantes en tarefas específicas. Anótase, para diferentes aspectos, o nivel adquirido desde pouco/baixo ata moito/alto.
Exemplo:
Podo marcar que o atractivo do reto foi "alto", que a dificultade das tarefas foi "intermedia" ou que o nivel de implicación e participación foi "baixo".
Esta é a fase final da vosa misión como bioenxeñeiros e bioenxeñeiras deportivas.
Tras o "nacemento" do voso deporte e a proba de lume que supuxo o torneo, toca perfeccionar o ADN da vosa creación para que sexa un organismo perfecto e funcional.
Lembra: un bo regulamento non é o que ten máis normas, senón o que permite que o xogo flúa sen interrupcións e que todo o mundo saiba en cada momento que ten que facer.
Aquí tes os pasos que ides seguir nesta última actividade antes de rematar o reto. Ánimo! A vosa misión está a piques de completarse!
Primeiro, reúnete co teu equipo de traballo para facer unha revisión crítica. Despois de xogar o torneo, seguramente detectastes "erros de código": normas que non quedaron claras, situacións de xogo inxustas ou momentos nos que o ritmo decaia. Debedes anotar todos eses matices e posibles melloras que fagan que o voso regulamento sexa máis redondo e divertido.
Unha vez que teñades as vosas propostas, faremos unha gran posta en común con toda a clase. É o momento de expoñer as vosas ideas e escoitar as dos demais equipos. Como expertos que xa probaron o deporte "en vivo", deberedes debater que cambios son necesarios para que a experiencia de xogo sexa equilibrada para todos e todas.
Coas conclusións do debate, procederedes á edición definitiva. Xa non estades probando; agora estades redactando a "Versión 2.0" e definitiva do voso deporte. Este documento debe recoller todos os cambios pactados, eliminando os fallos detectados e engadindo eses matices que o fan único e moito máis xogable que a primeira versión.
Finalmente, realizaredes a entrega final do proxecto. O resultado será un deporte creado, practicado e revisado por expertos/as (vós mesmos/as). Parabéns! Lograstes sintetizar unha nova especie deportiva lista para ser xogada en calquera lugar.
Fase final
Xa xogastes o voso deporte.
Agora mellorade o seu ADN.
Un bo regulamento deixa que o xogo flúa.
Todos saben que facer.
Pasos finais:
| Foinos excelente porque... | Fixémolo ben porque... | Custounos un pouco porque... | Debemos mellorar porque... | |
|---|---|---|---|---|
| Na participación e colaboración | Todos os membros do equipo participamos activamente e colaboramos axudando a outras persoas. (2) | Todos os membros do equipo participamos activamente, pero non axudamos a outras persoas porque nos centramos no noso traballo. (1.5) | A metade dos membros do equipo participaron activamente. (1) | Só traballou un membro do equipo e as outras persoas integrantes do grupo non colaboraron nin axudaron. (0.5) |
| O clima de traballo | Foi motivador e respectuoso, sen conflitos dentro do grupo. (2) | Foi agradable aínda que existiron pequenos conflitos que se resolveron inmediatamente. (1.5) | Foi pouco motivador porque houbo conflitos frecuentes que afectaban o traballo e que se resolveron con axuda. (1) | Foi conflitivo porque houbo moitos problemas que afectaron o traballo. (0.5) |
| Na posta en común de ideas | Todas as persoas do grupo fixemos achegas para completar as tarefas. Respectáronse as opinións e argumentouse o rexeitamento de propostas. (2) | Todas as persoas do grupo fixemos achegas para completar as tarefas, pero algunhas das propostas rexeitáronse sen razoamento. (1.5) | A metade do grupo achegou ideas e propuxo ideas e solucións para acadar as tarefas. (1) | Só un membro do equipo achegou ideas, o resto das persoas non levou propostas ao debate. (0.5) |
| Para o seguimento do traballo | Fixemos debates e analizamos os resultados do traballo para recoller propostas de mellora. (2) | Analizamos os resultados do traballo, e debatemos os resultados, pero non houbo propostas de mellora. (1.5) | Analizamos os resultados do traballo, pero sen debates nin propostas de mellora. (1) | Non fixemos a valoración do traballo nin debatemos os resultados. (0.5) |
| A autonomía | Foi plena xa que organizamos o funcionamento do grupo sen axuda, incluso axudamos a outros grupos a organizarse. (2) | Foi adecuada xa que organizamos o funcionamento do grupo sen axuda. (1.5) | Foi moderada xa que tivemos que solicitar axuda para organizar o traballo ao inicio, pero logo o equipo traballou con autonomía. (1) | Foi escasa xa que solicitamos axuda en varias ocasións para organizar o traballo. (0.5) |
Rúbrica para reflexionar e valorar a túa contribución ao reto grupal.
| Foime xenial porque... | Fíxeno ben porque... | Custoume un pouco porque... | Debo mellorar porque... | |
|---|---|---|---|---|
| Na comprensión do proxecto | Entendín todos os pasos para conseguir o reto final e o seu propósito. (2) | Souben o que tiña que facer no reto aínda que non entendín o seu propósito. (1.5) | Necesitei axuda para entender o reto e os pasos para acadalo. (1) | Aínda que solicitei axuda, non entendín as partes do reto. (0.5) |
| No traballo en equipo | Integreime ben no grupo, axudei as miñas compañeiras e compañeiros. Amosei moita iniciativa e fun parte importante do equipo. (2) | Integreime ben no grupo, axudei as miñas compañeiras e compañeiros. Acheguei poucas propostas, pero apoiei as propostas dos demais. (1.5) | Tiven dificultades para traballar en equipo. Non colaborei co resto do grupo. (1) | Non logrei integrarme ben no grupo e rexeitei o traballo. (0.5) |
| No traballo individual | Realicei as actividades individuais que correspondían e remateinas sen erros. Esforceime para realizalas sen axuda. Colaborei coas miñas compañeiras e compañeiros. (2) | Realicei as actividades individuais que correspondían, tiven éxito e fíxenas correctamente. Esforceime para acabalas sen axuda e entregueinas todas e a tempo. (1.5) | Non realicei todas as actividades individuais que correspondían, para algunhas necesitei axuda. Entregueinas nos tempos marcados. Máis da metade tiveron puntuacións correctas. (1) | Non realicei todas as actividades individuais que correspondían. Ademais, a pesares de ter axuda, os resultados deberían ser mellores. (0.5) |
| Nas sesións motrices | Participei activamente e esforceime para acadar as tarefas con éxito. Axudei ás miñas compañeiras e compañeiros. (2) | Participei activamente e esforceime para acadar as tarefas con éxito. (1.5) | Participei nas tarefas pero non me esforcei o necesario e algunhas saíron mal. Debería implicarme máis. (1) | A pesar de participar en algunhas actividades, frustreime moito e desistín en realizar ou intentar todas as tarefas. Debería esforzarme moito máis. (0.5) |
| Na superación do reto | Traballei co meu equipo para superar o reto, tamén axudei a outros equipos. Presentei o videotitorial rematado e a tempo co meu grupo. (2) | Colaborei na consecución do reto. Presentei o videotitorial co meu grupo. (1.5) | A miña participación para superar o reto foi baixa, os meus compañeiros e compañeiras tiveron que axudarme moito. (1) | Non participei na preparación do reto, deixei que as miñas compañeiras e compañeiros fixeran todo o traballo. (0.5) |
Licenciado baixo a Licenza Creative Commons Atribución Non-comercial Compartir igual 4.0