O cambio de actividades económicas

A sociedade actual, é moi diferente á dos vosos pais e nais e moito máis diferente aínda á dos vosos avós e avoas. Pensade, cantos de vós vos imaxinades traballando do sector primario e vivindo no mundo rural, de aquí a 5 anos? Se a túa resposta é "Non", non te preocupes, pensas o mesmo que calquera galego ou galega da túa idade. As estatísticas así o reflicten.

O normal é que a sociedade demande de vós actividades no sector terciario ou secundario que se concentran maioritariamente nas cidades.

Na actualidade a industrialización e a expansión do sector servizos xeraron empregos máis cualificados e mellor remunerados, o que favoreceu a saída de poboación dos núcleos rurais e intensificou o seu despoboamento. Hoxe en día esta dinámica mantense en Galicia, onde a perda de habitantes no rural é aínda máis marcada ca no conxunto do Estado. Un dos factores principais é que a mocidade accede a estudos superiores e, ao rematalos, non regresa ás súas localidades de orixe debido á escaseza de oportunidades laborais.

O poboamento rural caracterízase pola presenza predominante de paisaxes agrarias e de núcleos de pequena dimensión. Nos países desenvolvidos, estas zonas afrontaron dous problemas principais:

• Despoboamento: causado pola histórica migración do campo á cidade, acentuado pola falta de incentivos para a xente nova, como a escaseza de emprego ou unha oferta limitada de servizos.
• Envellecemento da poboación: ao emigrar a mocidade ás cidades, descende a taxa de natalidade. A predominancia de persoas maiores aumenta a demanda de servizos sociais, como atención sanitaria, pensións e coidados para persoas dependentes.. Como consecuencia, algúns dos concellos rurais galegos  presentan as porcentaxes máis baixas de xente nova de toda España.

As causas desta despoboación adoitan ser económicas. A busca de mellores condicións de vida leva ás persoas das zonas rurais a emigrar.
Entre os factores que inflúen destacan:

• A escaseza de servizos públicos, como hospitais
• A falta de centros educativos ou as longas distancias para acceder a eles
• A carencia de emprego
• O difícil acceso a comercios
• A falta de actividades de lecer
• A mecanización do campo

Os efectos do despoboamento

O efecto deste abandono das zonas rurais máis evidente é o envellecemento da poboación que ten un forte impacto social, económico e demográfico:

• Pérdese poboación activa: Ao marchar a mocidade cara ás cidades, a traballar ou estudar, diminúe o número de persoas en idade laboral, o que afecta á produtividade e á economía local.
• Prodúcese un aumento da dependencia social: Ao haber máis persoas maiores que precisan atención médica, pensións e coidados de longa duración, fai que se precise de máis  servizos sociais, relacionados con idades avanzadas.
• Perda de servizos coma transporte público, centros de ensino e de saúde...
• Un descenso da natalidade: A falta de xente nova, en idade fértil,  reduce o número de nacementos, facendo máis evidente o a diminución da poboación total.
• Risco de despoboamento e abandono de núcleos: As pequenas vilas poden quedar case deshabitados, o que tamén pode levar ao abandono de terras cultivables e do mantemento do patrimonio rural.
• Debilitamento do tecido social e das relacións comunitarias: Ao desaparecer a poboación nova, redúcese a organización, a dinamización e a participación en actividades culturais, educativas e sociais.