No mundo, cada día nacen e morren persoas, aparecen novos veciños e veciñas, nas vosas localidades, algúns deixaron a súa casa para instalarse noutro lugar e iniciar unha vida distinta, outros chegan ao voso concello, aldea ou barrio buscando unha vida mellor. Todo isto fai que a poboación de calquera territorio estea en continuo movemento e transformación: nacementos, migracións, oportunidades laborais e profesionais que inflúen na maneira na que a poboación se distribúe polo territorio.

Neste novo reto empregarás a demografía, a ciencia que estuda a poboación. Con ela non só saberás cantos habitantes ten un lugar, senón que serás capaz de comprender as sociedades rurais e urbanas, as súas características e os comportamentos das súas poboacións: de onde veñen e cara onde van. Con toda esa información, chegarás a conclusións que che permitirán prever a súa evolución e estudar as necesidades que lles xurdan no futuro.

Cando chegues ao final, poderás chegar a responder preguntas coma estas:

• Por que nalgunhas zonas hai moita xente e noutras hai poucas?
• Por que en Galicia a poboación abandona o campo?
• Terá un futuro viable o rural galego?

Moitas preguntas, que precisan moitas respostas e unha aldea que precisa dos vosos coñecementos e da vosa axuda. Tedes moito que descubrir e reflexionar para redactar o voso propio bando municipal.

Adiante! Imos aló!