Estudo de caso

Hoxe, mentres realizades a vosa rotación neste importante departamento, temos unha noticia de última hora que marca a realidade do sistema sanitario. A nosa compañeira reporteira acaba de traer unha noticia sobre as listas de espera para transplantes de ril, que cada vez se volven máis longas. A cada mes, entran novos pacientes, mentres que as doazóns de órganos non son suficientes para cubrir toda a demanda. A situación é crítica, pero os profesionais deste departamento traballan sen descanso para garantir que os transplantes se realicen de maneira efectiva e segura.

A tarefa de hoxe será analizar esta problemática, comprender os tempos de espera e a xestión das doazóns, e valorar a importancia de cada paso no proceso de transplante de órganos.

A noticia está sobre a mesa!

Transcrición a texto da noticia presentada no telexornal de onte:

"Hoxe falamos da realidade das listas de espera para transplantes de ril no noso país.

Nos hospitais, centos de pacientes esperan unha segunda oportunidade grazas á doazón de órganos.

Actualmente, hai 120 persoas en lista de espera para un transplante de ril. Cada mes, os hospitais conseguen realizar 15 transplantes, pero a situación complícase porque cada mes entran 5 novos pacientes na lista. Ademais, un 40% dos pacientes teñen prioridade alta, o que significa que recibirán o transplante antes que o resto.

Expertos en transplantes insisten na importancia da doazón de órganos. A colaboración cidadá é clave para reducir os tempos de espera e salvar vidas.

Desde os hospitais, fan un chamamento á poboación: Facerse doante é un xesto sinxelo, pero pode marcar a diferenza entre a vida e a morte."

Retroalimentación

Resolve as cuestións propostas e explica brevemente como chegaches ás respostas.

Cuestión 1. Despois de ler a noticia do telexornal, localiza a seguinte información:

Total de persoas en espera:
Transplantes por mes:
Novos pacientes por mes:
Pacientes con prioridade alta:

Cuestión 2. Se a lista non cambia, en cantos meses recibirán un ril todas as persoas en espera?

Cuestión 3. Se cada mes entran 5 pacientes novos na lista, cal será a redución real de pacientes por mes? En cantos meses aproximadamente se reduciría á metade a lista de espera?

Cuestión 4. Se o 40% dos pacientes teñen prioridade alta, cantas persoas recibirán o transplante antes que as de prioridade normal?

Cuestión 5. Como influiría na lista de espera o feito de que máis persoas se fixeran doantes de órganos?

Cuestión 6. Cales son as principais dificultades que poden ter os profesionais ao xestionar listas de espera e transplantes, e como se poderían superar?

Retroalimentación

Cuestión 1.

Total de persoas en espera: 120
Transplantes por mes: 15
Novos pacientes por mes: 5
Pacientes con prioridade alta: 40%

Cuestión 2.

Cada mes realízanse 15 transplantes, e hai 120 pacientes en espera.

120 ÷ 15 = 8 meses

Desta forma, tardaranse 8 meses en facer todos os transplantes se non entran máis pacientes na lista.

Cuestión 3.

A metade da lista sería 120 ÷ 2 = 60 pacientes.

Cada mes faise 15 transplantes (saen da lista) e hai 5 pacientes novos (súmanse á lista).
A redución real cada mes é: 15 - 5 = 10 pacientes menos.

Agora calculamos cantos meses fan falta para pasar de 120 a 60 pacientes:

(120 - 60) ÷ 10 = 6 meses

A lista de espera reduciríase á metade en 6 meses.

Cuestión 4.

O 40% de 120 pacientes teñen prioridade alta:

(40 ÷ 100) × 120 = 48 pacientes

Desta forma, 48 pacientes recibirán o transplante antes que os de prioridade normal.

Cuestión 5.

Se máis persoas se fixeran doantes de órganos, a lista de espera para recibir un transplante reduciríase notablemente. Isto ocorrería porque habería máis órganos dispoñibles para asignar aos pacientes que os necesiten.

Cuestión 6.

As principais dificultades que poden ter os profesionais ao xestionar listas de espera e transplantes son:

Número insuficiente de doantes: Se non hai suficientes doantes de órganos, a lista de espera crecerá e as persoas terán que esperar moito tempo.
Para tentar solucionalo, poderíase aumentar as campañas de sensibilización sobre a importancia da doazón de órganos.
Compatibilidade entre doante e receptor: Non todos os órganos son compatibles entre diferentes persoas, polo que o transplante pode non ser posible en todos os casos.
Para solucionalo, poderíase utilizar técnicas avanzadas para mellorar a compatibilidade e mellorar as listas de asignación de órganos.
Prioridades e urxencia: Determinar quen recibe un órgano primeiro pode ser difícil e implicar dilemas éticos.
Para solucionalo, poderíanse establecer criterios médicos ben definidos que prioricen aos pacientes máis necesitados, pero tamén garantir que as decisións sexan xustas e transparentes.
Risco de rexeitamento do transplante: O sistema inmunitario do receptor pode rechazar o órgano transplante.
Para solucionalo, poderíase mellorar os tratamentos inmunosupresores e asegurarse de que os pacientes teñan acceso a un seguimento médico adecuado despois do transplante.