Son vídeos formativos que inclúen unha guía, paso a paso, sobre como realizar unha tarefa específica, aprender unha habilidade ou entender un concepto de forma visual.

Unha das súas características é que se comparten en plataformas audiovisuais para que os vexan outras persoas.

Hoxe en día tedes acceso a unha gran cantidade de información en Internet. Un claro exemplo é o momento no que tecleades a xa famosa palabra "YouTube" e vos somerxedes nun dos xigantes de Internet. Nel podedes visualizar moitísimos vídeos de diferentes temáticas.

Entre tanto vídeo, podedes atopar un gran catálogo de videotitoriais de todo tipo: de videoxogos, de receitas de cociña, de impresión 3D, de robótica, de deporte... pero con tanta opción hai que preguntarse, por cal vos decidides?

Para iso debedes coñecer as características que debe ter un bo videotitorial. Atentos e atentas!

O tema: A persoa que está a ver o vídeo debe ter claro cal é o tema que se está a tratar.

A linguaxe: Entendes o que di o narrador? Se non o entendes é que emprega unha linguaxe moi técnica, o que pode ser un problema. Empregar unha linguaxe sinxela facilita a comprensión e fará que sexa máis doado de seguir.

A aprendizaxe visual:

• O videotitorial vai acompañado dunha representación visual da tarefa ou execución motriz, o que facilita a aprendizaxe.
• É recomendable comunicar de forma oral e non abusar de moito texto.

Os pasos: Están secuenciandos, un a un, de xeito que é doado seguilos.

A motivación: No vídeo hai demostracións, animacións e exemplos visuais, o que fai que o vídeo sexa máis atractivo que se fose en formato texto.

Acceso e alcance: Permite compartirse en distintos formatos, o que facilita a forma de acceder a eles e de dar a coñecer o recurso creado.

Saberiades agora diferenciar un bo videotitorial dun non tan bo? Estades seguros/as?