A meteoroloxía é a ciencia encargada do estudo do tempo atmosférico. Entendemos por este a situación da atmosfera nun momento e lugar determinado.
Os datos meteorolóxicos recóllense a partir da medición da temperatura, presión, humidade, dirección e forza do vento, precipitación, así como da medición das horas de sol, da nebulosidade, cómputo de días de orballo, xeada, neve, néboa ou treboada.
Para obter estes datos usamos distintos aparellos que se soen atopar en estacións ou en casetas meteorolóxicas: termómetro, barómetro, cataventos, anemómetro, pluviómetro...
Non debemos confundir os conceptos de tempo e clima. O primeiro designa o estado da atmosfera nun determinado momento nun lugar concreto, mentres que o clima fai referencia á sucesión periódica de tipos de tempo nun lugar ao longo de moitos anos.