Esta proposta didáctica está baseada nos eixes da materia "Lingua Castelá e Literatura" de 5º de primaria:

• Funcionamento da lingua e os seus usos, nos que o alumnado aprenderá a analizar e comprender textos informativos, así como textos multimedia (como vídeos, presentacións), desenvolvendo habilidades críticas. 

• Comprensión de textos escritos, nos que o alumnado terá que  desenvolver habilidades para comprender textos de diversa índole, identificar ideas principais, inferir significados e recoñecer detalles.
• Produción de textos escritos no que o alumnado terá que expresarse por escrito de xeito clara e coherente, desenvolvendo a ortografía, a gramática e a redacción. Conleva o estudo e aplicación de regras gramaticais e ortográficas.
• Comprensión de textos orais, nos que o alumnado terá que extraer información, identificando ideas principais, inferir significados...
• Produción de textos orais, no que o alumnado terá que compartir información, expresarse con coherencia, principalmente en dúas prácticas discursivas (argumentación e exposición)

• Produción de contidos audiovisuais e uso de ferramentas TIC, nas que o alumando terá que aprender a manexar de forma básica as ferramentas dixitais para a elaboración da infografía e saber buscar material con licenzas libres para o programa, de tal forma que se respecten os dereitos de autoría.

• Colaboración na consecución dos obxectivos de desenvolvemento sostible (ODS) e á súa conexión có mundo real. En concreto, ODS 5 (lograr a igualdade entre os xéneros e empoderar a todas as mulleres e as nenas) e o ODS16 (promover sociedades xustas, pacíficas e inclusivas). Como contribuímos? A historia das mulleres foi tradicionalmente ignorada ou minimizada. A visibilización das mulleres na historia axuda a educar á sociedade sobre o seu papel no mundo. Isto axuda a crear un futuro máis xusto e inclusivo para todos. Cando as nenas e os nenos aprenden sobre mulleres que tiveron un impacto no mundo, comezan a ver que as mulleres poden ser líderes, inventoras, artistas, científicas e todo o que queiran ser. Isto axuda a romper cos estereotipos de xénero que limitan as oportunidades das mulleres. Cando as nenas e os nenos ven a mulleres que tiveron éxito nas súas carreiras, inspíranse para perseguir as súas propias metas, promovendo o seu empoderamento. Isto axuda a crear un futuro máis equitativo para as mulleres. Polo tanto, ao incluír ás mulleres nos currículos escolares, pódese axudar ás nenas para ver que poden ter éxito en calquera área que elixan. Isto pode axudar a reducir a brecha de xénero na educación e no mercado laboral.

Este REA, en relación coa programación didáctica de referencia publicada en PROENS para a materia de "Lingua Castelá e Literatura" de 5º de educación primaria, contextualízase na terceira unidade didáctica "Leo para coñecer, para saber, para aprender, para gozar"

O recurso englóbase fundamentalmente nos bloques de contidos 2, 3, 4, 5 e 6.

Bloque 2: Comunicación oral. Recolle aspectos fundamentais da lingua oral. O uso oral da lingua ten o propósito de favorecer a adquisición de destrezas específicas de pronuncia e entoación idóneas; de estratexias de recoñecemento, selección e interpretación da información; da construción e comunicación do coñecemento mediante a planificación e produción de textos orais e multimodais; da identificación e modelización das propiedades e tipoloxías dos textos; da interacción oral en situacións de aula, e de escoita activa na resolución dialogada de conflitos, respectando as normas esenciais da cortesía lingüística. A lectura e a produción oral implican unha paulatina mellora na comprensión de textos e inciden na aprendizaxe da lingua.

Bloque 3: Comunicación escrita. Inclúe aspectos básicos e indispensables da lingua escrita, intensificando gradualmente o uso persoal, autónomo e creativo da lingua escrita. Implica o coñecemento das posibilidades que ofrece o código desde a perspectiva do léxico, da ortografía, da estrutura do discurso e das dimensións ética e estética. A produción de textos escritos e multimodais supoñerá a procura do xénero discursivo e do tipo de texto adecuado para cada situación comunicativa, utilizando, tanto de forma individual como colectiva, estratexias de planificación, redacción, revisión e edición. Nesta etapa teñen que consolidarse o dominio de técnicas gráficas, a relación entre son e grafía, as normas ortográficas convencionais e a disposición do texto desde as diferentes fases do proceso evolutivo da escritura. A lectura, tanto de forma individual como compartida e a comprensión lectora, permitirán ao alumnado adquirir as destrezas necesarias para a identificación das ideas máis relevantes e do sentido global dos textos, para a realización de inferencias e para a detección dos usos discriminatorios da linguaxe.

Bloque 4: Alfabetización mediática e informacional. Integra criterios de avaliación e contidos relacionados coa procura, selección e contraste da información procedente de fontes documentais variadas en distintos soportes e formatos con criterios de fiabilidade e pertinencia. Propóñense un proceso de investigación e pescuda para que o alumnado, individualmente ou de forma cooperativa, progrese na planificación e procura de información en diversos contextos, formatos e soportes, para transformala, xestionala, comunicala de maneira persoal e creativa, e utilizala con distintos fins, adoptando un punto de vista crítico e de respecto pola propiedade intelectual. A biblioteca de aula ou do centro serán os espazos ideais para desenvolver proxectos globais e interdisciplinares, coa utilización de todos os recursos dixitais que dispoñan.

O bloque 5, Educación literaria, pretende implicar os alumnos e alumnas nun proceso de formación lectora que continúe ao longo de toda a súa vida. Acadar este obxectivo supón iniciar un camiño de progreso deseñado cara á construción de personalidades lectoras. A lectura, a comprensión e interpretación de obras próximas aos seus gustos e á súa madurez cognitiva, o recoñecemento dos elementos básicos da obra literaria, a dramatización ou interpretación de fragmentos e a creación de textos propios con intención literaria facilitará o progreso na construción da identidade lectora, na comprensión das relacións con outras manifestacións artísticas ou culturais e no coñecemento básico sobre obras representativas tradicionais e actuais da literatura. As bibliotecas de aula, do centro e as virtuais conformarán os escenarios básicos para as actividades literarias compartidas

Bloque 6: Reflexións sobre as linguas e os seus usos no marco de propostas de produción e comprensión de textos orais, escritos ou multimodais, incorpora criterios de avaliación e contidos relacionados co coñecemento da lingua e a súa organización, facilitando a construción guiada de conclusións propias sobre o sistema lingüístico e a mellora dos textos propios. Supón para o alumnado o establecemento de xeneralizacións básicas respecto do funcionamento da lingua, prestando especial atención ás diferentes relacións de forma, función, concordancia e significado entre as palabras e grupos de palabras; á observación e comprensión das regras de acentuación; ás modalidades oracionais en relación coa intención comunicativa; á correlación temporal establecida polos tempos verbais e ao uso de dicionarios, en distintos soportes. Preténdese, así mesmo, facilitar e permitir ao alumnado o coñecemento e a reflexión sobre a situación das linguas da contorna e do seu ámbito escolar dentro dun contexto plurilingüe, e a identificación de similitudes e diferenzas entre estas para conseguir unha competencia comunicativa integrada

Porén, é fundamental comprender que o avance nestes aspectos lingüísticos non  debe abordarse de xeito illado; o seu tratamento debe ser integrador e globalizado, que lle permita ao alumnado, adquirir coñecementos útiles para interpretar os feitos, sucesos e problemas dun xeito integral. Isto implica a transferencia de coñecementos, habilidades e actitudes doutras áreas disciplinarias, que se reflicten nestes bloques interconectados. 

Así, este enfoque aborda de xeito transversal os seis bloques, enfocándose especialmente nos seguintes obxectivos da materia.

A continuación inclúense os descritores das competencias clave estipuladas pola normativa traballadas neste recurso.