Signos e síntomas dunha enfermidade

Signos síntomas dunha enfermidade

Signos e síntomas

Os signos e os síntomas dunha enfermidade son dúas formas de saber que algo non vai ben no corpo, pero teñen diferenzas importantes:

Signos

Os signos son cambios que poden ser observados por outra persoa, como un médico. Por exemplo, a febre, unha ferida ou a pel amarela son signos porque se poden medir ou ver claramente.

Imaxe dun termómetro indicando 39 grados de temperatura corpotal — Canva. *Febre* (CC BY-SA)

Síntomas

Os síntomas son sensacións que só a persoa enferma pode notar. Por exemplo, a dor de cabeza, o mareo ou o cansazo son síntomas porque non se poden medir directamente, senón que a persoa os describe.

Imaxe dunha persoa mostrando dores no abdome — Canva. *Síntoma* (CC BY-SA)

Por tanto, os signos son obxectivos e visibles, mentres que os síntomas son subxectivos e só quen os sofre pode explicalos.

Audio

Elaboración propia coa ferramenta Narakeet. Transcrición de texto a audio (CC BY-SA)

Apoio visual

Poster sobre signos e síntomas — Elaboración propia coa ferramenta Canva (CC BY-SA)

Analíticas básicas

Cando imos ao médico porque non nos sentimos ben, ás veces necesitamos facer algunhas probas para saber que está pasando no noso corpo. Estas probas axudan a detectar enfermidades de forma temperá e a decidir o tratamento máis axeitado. En Atención Primaria, os médicos e enfermeiros adoitan solicitar estas análises dependendo dos síntomas de cada paciente, das que explicamos as máis comúns:

Frotis farínxeo

O persoal médico usa un cotonete longo para recoller unha mostra da gorxa.

Serve para detectar infeccións bacterianas como a amigdalite estreptocócica.

Frotis nasal

Semellante ao farínxeo, pero a mostra tómase do nariz.

Úsase para detectar virus como a gripe ou a COVID-19.

Frotis vaxinal ou cervical (Papanicolau)

Realízase en mulleres para detectar infeccións ou posibles cambios nas células do colo do útero que poderían indicar risco de cancro.

Frotis de pel ou de lesións

Se hai unha erupción sospeitosa ou unha ferida infectada, pódese tomar unha mostra para analizar se hai bacterias ou fungos.

Análises hormonais

Para comprobar os niveis de hormonas, como a tiroide ou as hormonas reprodutivas.

Proba de alerxias

Pódese facer unha análise de sangue ou unha proba cutánea (pondo pequenas mostras de posibles alérxenos na pel).

Análise de feces

Serve para detectar infeccións dixestivas, presenza de sangue oculto ou problemas dixestivos.

Análise de sangue

Extráese unha pequena cantidade de sangue para estudar diferentes valores, como os glóbulos brancos (que aumentan cando hai infección), os niveis de ferro (para ver se hai anemia) ou a glicosa (importante para a diabetes).

Análise de ouriños

Recóllese unha mostra de urina para comprobar se hai infeccións, problemas nos riles ou outras enfermidades.

Pode detectar a presenza de bacterias, azucre ou proteínas anormais.

Radiografía

Usa raios X para ver o interior do corpo, como os ósos ou os pulmóns.

Úsase, por exemplo, para detectar fracturas ou pneumonía.

Proba de función pulmonar

A persoa sopla nun aparato especial para medir como funcionan os pulmóns.

Axuda a diagnosticar enfermidades como a asma.

Estas probas axudan aos médicos a diagnosticar enfermidades con máis precisión e a indicar o mellor tratamento.

Coñecer o noso corpo é importante para coidarnos mellor

Audio

Elaboración propia coa ferramenta Narakeet. Transcrición de texto a audio (CC BY-SA)

Exercicios

Elaboración propia coa ferramenta Narakeet. Transcrición de texto a audio dos exercicios (CC BY-SA)

Exercicio. Martín, un rapaz de 14 anos, chega á consulta do médico acompañado da súa nai. Desde hai dous días sente moi canso e con pouco apetito. Tamén di que lle doe a cabeza e que ás veces ten arrepíos, aínda que non sabe explicar moi ben por que.

A súa nai conta que esta mañá notouno moi quente e, ao poñerlle un termómetro, viu que tiña 38,5 ºC de febre. Ademais, di que cando Martín se ergueu da cama, mareouse e tivo que sentarse de novo. O médico observa que ten a pel máis pálida do normal e nota que a súa gorxa está vermella e inflamada.

apartado a. Cal dos síntomas menciona Martín?
apartado b. Que signos observan a súa nai e o médico?
apartado c. Como pode axudar unha análise de sangue ou ouriños a confirmar o diagnóstico?
aparatado d. Se foses o médico, que recomendacións lle darias a Martín?

Cal dos síntomas menciona Martín?

Estes son síntomas porque só Martín pode sentilos e describilos: cansazo, falta de apetito, dor de cabeza, arrepíos e mareo.

Que signos observan a súa nai e o médico?

Estes son os signos porque son obxectivos e poden ser medidos ou vistos por outra persoa: febre de 38,5 ºC (medida cun termómetro), palidez (a nai e o médico poden vela), gorxa vermella e inflamada (o médico obsérvao durante a exploración)

Como pode axudar unha análise de sangue ou ouriños a confirmar o diagnóstico?

Unha análise de sangue pode mostrar un aumento dos glóbulos brancos, indicando unha posible infección.
Se o médico sospeita dunha infección de gorxa, pode solicitar un frotis farínxeo para identificar se hai bacterias como o estreptococo.
Se houbera signos de deshidratación (por exemplo, se Martín bebe pouco por sentirse mal), unha análise de ouriños podería mostrar unha maior concentración de substancias.

Posible diagnóstico: Martín podería ter unha infección, como unha faringoamigdalite ou unha gripe, pero o médico necesitaría máis información para confirmalo.

Se foses o médico, poderías dar estas recomendacións a Martín:

Se foses o médico, que recomendacións lle darias a Martín?

Debería realizar as seguintes probas médicas para confirmar o diagnóstico.

Frotis farínxeo → Para confirmar se hai infección bacteriana (como unha amigdalite estreptocócica).
Análise de sangue → Para comprobar os niveis de glóbulos brancos e descartar infeccións máis graves.
Análise de ouriños → Para detectar posibles signos de deshidratación ou infección.

Ademais, os seguintes coidados:

Se é unha infección viral (gripe, arrefriado...):

Descanso e hidratación abundante.
Paracetamol ou ibuprofeno para a febre e a dor (sempre con recomendación médica).
Alimentos brandos e mornos para non irritar a gorxa.
Evitar esforzos físicos ata recuperarse.

Se é unha infección bacteriana (amigdalite):

O médico pode prescribir antibióticos se é necesario.
Seguir o tratamento ata o final, aínda que os síntomas melloren antes.

Se hai mareo e febre alta:

Controlar a temperatura regularmente.
Evitar cambios bruscos de posición (erguerse moi rápido pode causar máis mareo).

Licenciado baixo a Licenza Creative Commons Atribución Compartir igual 4.0