"Popular music"
O xénero da coñecida como música pop ten a súa orixe no Reino Unido e Estados Unidos a mediados do século XX. Isto non quere dicir que a música deste estilo non existira antes en diferentes partes do mundo, pero foi entón cando comezou a empregarse o termo "pop" como abreviatura das palabras popular music (música de orixe popular) na lingua inglesa. A idea principal deste xénero era crear unha tendencia simple, pensada para o disfrute das masas e que todo o mundo puidera entender; cantaruxar as súas pegañentas melodías ou incluso tocar a música das cancións. Noutras palabras, xurde aquí o que agora coñecemos como a música comercial que escoitamos pola radio e que en ocasións cústanos horrores quitarnos das nosas cabeciñas!
Como podedes imaxinar, o que acontece coa música creada para agradar a tódolos públicos, é que realmente o consegue, o que se traduce en que se conseguen cancións que son éxitos e superventas coa súa fama correspondente. No pasado existían outros xéneros que podían enfrontarse ao pop en número de ventas, coma o rock and roll ou a música de corte máis clásico. O certo é que dende que entramos no século XXI, todas as listas de ventas están encabezadas por artistas que pertencen ao xénero da música pop, tal e como podedes comprobar na seguinte táboa premendo no enlace. Seguramente recoñeceredes moitos dos nomes que aparecen, verdade?
