Máis que protesta
A lingua precisa
Cada grupo revisará o borrador seguindo estas dúas fases.
1. Revisión global
| Aténdese o contexto e as consecuencias dos feitos? | Hai distintas perspectivas sobre o que está a pasar? | Inclúense valoracións propias sobre os feitos? | Tómase información de protagonistas e/ou especialistas? | Axustáronse e resaltáronse tipograficamente o titular e a entrada? |
| Recóllense na entrada as cuestións básicas ou declaracións de protagonistas? | Cáptase a atención dos lectores no inicio do corpo? | Combínase información esencial e complementaria (descricións, declaracións)? | Hai apartados con títulos ou ventás para resaltar aspectos e facilitar a lectura? | Inclúense modalizacións que amosen subxectividade? |
| Achégase abundante material gráfico, como varias imaxes? | Aprécianse algúns recursos expresivos? | Empregouse un léxico axeitado e variado? | O texto está ben enfiado, con conectores adecuados e oracións non longas? | As oracións están ben construídas e a expresión é correcta? |
Realizade as melloras precisas.
Para a reportaxe audiovisual:
- Atendestes o contexto no que se produciron os feitos, as consecuencias do que aconteceu ou distintas perspectivas sobre o que pasou?
- Incluístes valoracións propias sobre os feitos?
- Tomastes información de persoas participantes ou interesadas nos feitos?
- Fixestes unha entrada atraente cun resumo, testemuña ou pregunta?
- Aprécianse os bloques e combinastes neles información esencial (datos) e complementaria (descricións, declaracións), alternándoas para manter o interese?
- O narrador marca ao xeito as transicións entre as partes?
- Incluístes material sonoro para recrear ambientes?
- O final funciona como peche?
- Empregastes unha linguaxe adecuada, con oracións curtas e claras?
- O ton e o volume son axeitados? Soa natural?
2. Profundo pero non complexo
Poñede especial coidado en revisar o texto para garantir que a expresión non sexa excesivamente complicada, nin sintactica nin lexicamente. As oracións longas de máis, os parágrafos recargados ou inconexos, as perífrases e circunloquios innecesarios ou as imprecisións dificultan a comprensión e poden levar aparellados anacolutos e desvíos. Practicade estas cuestións cos seguintes exercicios.
a) Convertede estas estruturas sintácticas coa orde lóxica alterada en estruturas lineais (SUX-VBO-COMPL). Pasade tamén aquelas oracións que estean en voz pasiva a activa e mellorade a puntuación.
- Nesta última semana tivo a plataforma de afectados unha entrevista co alcalde que había días reclamaran.
- A última hora da tarde deste luns a pesar do seu estado de saúde o tesoureiro da Asociación Pardal deu unha rolda de prensa.
- Nas dependencias do Concello máis de dez mil sinaturas coas que se solicita o arranxo das beirarrúas foron entregadas a primeira hora da mañá.
- Máis diñeiro para as guerras en Oriente medio pediu onte no Congreso na presentación do proxecto de orzamentos para 2008 o presidente de EE.UU.
b) Simplificade agora o seguinte texto, mantendo o contido completo. Eliminade todo o que non engada información e reducide as reviravoltas na expresión.
As substancias estupefacientes que tiñan no seu poder as persoas acusadas descubríronse cando a policía de tráfico procedeu a realizar un control rutinario. A parella que ocupaba o vehículo foi obxecto de sanción por parte das autoridades xudiciais logo dun xuízo rápido que se celebrou despois de transcorreren dous días tras a detención e que tivo unha duración de apenas media hora.
A este respecto, a avogada defensora quixo aclarar ante os medios de comunicación e difusión que ficou comprobado que os acusados neste xuízo non forman parte de ningunha rede de traficantes de drogas, polo que transmitiu a solicitude de respectar, na medida do posible, o seu anonimato. Así mesmo, quixo facer sabedora a opinión pública da substancia requisada, marihuana, que non se atopa entre as que provocan un perigo importante para a saúde se se consome de xeito ocasional, asegurou a letrada.
c) Localizade marcadores equivalentes a algún dos presentes no segundo parágrafo. Empregade os demais para redactar un terceiro parágrafo que continúe loxicamente o texto.
En definitiva, Alén diso, En efecto, Á parte, A todo isto, En relación co anterior, De igual forma, En concreto, Ademais, Con todo.
d) Achegade alternativas para facer que o seguinte texto sexa máis claro e sinxelo. Reescribídeo mantendo todo o seu contido, pero evitando a introdución de incisos explicativos, a acumulación de subordinadas e a referencia pronominal distante.
O pasado primeiro de Maio foi un chisco diferente a todos os demais da historia pois, ademais de escoitarse na voz dos distintos líderes sindicais proclamas sobre o dereito ao traballo e a protesta contra da reforma do mercado laboral (esa que ía crear emprego e só crea miseria), por vez primeira tiveron case que o mesmo protagonismo as queixas contra os recortes en sanidade, educación, subsidios ou contra os bancos e os seus abusos. Este converteuse, ademais de na festa da Clase Obreira (que existe, igual hai uns anos dubidabamos, pero existe, o proletariado volve existir... chea ela de mozos e mozas con carreiras e mestrados e sobreexplotados), nunha reivindicación dos dereitos máis básicos e nunha protesta contra o estado de acoso e derrubo que nos malgoberna.
e) Substituíde nestas oracións as palabras comodín ou propias dun rexistro coloquial por termos máis precisos, como poden ser: convocar, percorrer, producir, posuír, desenvolver, argüír, pertenzas...
- Aquelaron as súas cousas, porque tiraban xa.
- Fixeron moitos quilómetros facendo moito ruído para protestar.
- A cooperativa vai facer unha reunión para poñer as normas de venda a socios.
- A empresa ten recursos suficientes e ultimamente ten moi bos resultados. Os seus técnicos teñen un proxecto pioneiro.
- Despois de preguntarlle, díxonos que non quería falar.
- Sorpresivamente, díxolle que na prensa dixeran que as praias estaban pechadas.
Coavaliación
Presentade na aula as reportaxes elaboradas e coavaliádevos empregando a seguinte grella:
Anterior
Temos a palabra.
Seguinte
O que damos de nós.