Máis que protesta
Con sentido
Intentamos precisar a diferenza entre información e opinión, organizamos os datos obxectivos dos que dispoñemos e elaboramos o noso relato da aprendizaxe.
1. Rexistrando a opinión
Sabemos que a información está presente en discursos non marcados, nos que se aprecia o uso de datos e feitos contrastables, a ausencia do emisor no texto, a representación directa e con obxectividade da realidade, con expresión neutra, a presenza de perspectivas plurais ou o léxico non valorativo. Un discurso marcado pola presenza do emisor entrará no territorio da valoración e opinión, da transmisión dunha postura ante as cousas. As marcas principais son:
a) Localizade os fragmentos valorativos ou de opinión nestes parágrafos tomados da reportaxe Mercagalicia, o lado escuro da xestión, do xornal Lindeiros. Explicade como os identificastes.
Mercagalicia é unha sociedade mercantil na que o concello de Santiago é o accionista maioritario cun 51 %. Isto convértea nunha empresa pública segundo a catalogación do Ministerio de Facenda.
O sucedido tería que servir para que se revisaran procedementos ou se implementaran máis controis. Saber de que serviron as auditorías dos últimos anos ou coñecer que mostraban e que ocultaban ou ignoraban será importante para dirimir responsabilidades penais, pero tamén políticas se chegaran a existir.
Joaquín Macho, o ex xerente agora denunciado, accedeu á dirección de Mercagalicia en 1995, dous anos despois da súa creación, e mantívose ata decembro pasado, momento no que foi cesado. Está acusado de administración desleal e apropiación indebida. A auditoría desvelou que estaban concertados distintos créditos que non foron devoltos.
Naceu en 1993 e, situada no Polígono do Tambre, concentra o maior mercado de froitas e verduras da bisbarra, do que se nutren moitos establecementos. A plataforma de distribución para Galicia dos supermercados Día tamén esta situada en Mercagalicia. A sociedade tivo un activo económico nas últimas contas publicadas na web de máis de 5 millóns de euros, o que dá unha idea do seu volume de negocio.
b) Revisade as distincións realizadas na actividade anterior (de Situámonos) para comprobar que a opinión está -toda ela- separada da información obtida, ao tempo que conectada con ela. Organizade ambas seguindo unha lóxica temporal e/ou causal na disposición das cuestións centrais do tema que traballades. Debe apreciarse todo isto visualmente por medio de frechas, cadros de cores ou outra fórmula.
2. De entrada
a) Coa información xa ordenada por claves (cando menos: orixes do problema, consecuencias máis importantes, propostas de solución existentes, medidas xa tomadas, mobilizacións realizadas, apoios acadados e presenza na prensa), imos crear un resumo de dúas ou tres liñas para cada unha. Contades cun apoio a seguir para iso.
b) Anotade agora debaixo de cada resumo a xeito de entrada xornalística as persoas que achegaron valoracións ou opinións relevantes, no caso de que as haxa, xunto co fragmento textual máis significativo das súas declaracións.
O resumo
Relato da aprendizaxe
Finalmente nesta parte, poñede por escrito individualmente na casa:
* Conseguiches implicarte plenamente no labor? Por que?
* Que che custou máis entender sobre este tema?
* Que actividade foi máis interesante e útil? Por que?
* Que cambios no coñecemento destas cuestións experimentaches ao longo destas sesións de traballo?
* Cal cres que é a mellor maneira de traballar estes contidos?
* Para que che pode servir a aprendizaxe realizada?
* Como podes mellorar o teu traballo de aquí en adiante nesta secuencia?
Anterior
Situámonos.
Seguinte
Obradoiro.