0- Pronuncia e entoación. Algunhas consideracións teóricas

A lectura é unha actividade complexa que inclúe varios niveis de procesamento. Existen catro procesos implicados na lectura:

• A identificación de letras.

• A lectura de palabras e pseudopalabras.

• Os signos de puntuación.

• A comprensión de oracións e de textos.

 As operacións e fases que interveñen na comprensión dun texto van dende o recoñecemento das letras e a súa representación fonolóxica até chegar á comprensión do texto.

A Ruta de codificación fonolóxica é o procedemento de acceso ao significado das palabras que require necesariamente a súa representación fonolóxica previa; é dicir, a conversión das letras ou sílabas en fonemas e sons (para entenderes mellor: a que nos leva a diferenciar o "c" de "casa" do de "ceo").

Ruta de acceso léxico directo: este procedemento consiste en que, para acceder ao significado dunha palabra, establécese unha conexión directa entre a grafía da palabra e o seu significado (é dicir, recoñecemos a palabra; se te trabucas ao leres "pseudopalabras" posiblemente esta é a ruta que priorizas, porque, como non a recoñeces, "tropezas" nela; tamén poderás ter problemas cos "parónimos"; máis adiante explicaremos estes termos).

Teoría da dobre ruta: posición que defende que o lector poida acceder ao significado dunha palabra de dúas maneiras: a través da ruta de codificación fonolóxica e a través da ruta de acceso léxico directo. Polo que parece, os mellores lectores empregan esta ruta.

En relación ao recoñecemento de palabras, temos dous importantes trastornos na aprendizaxe da lectura: o retraso lector (en alumnos con dificultades para o acceso léxico, tanto pola ruta fonolóxica como pola visual) e a dislexia.

A aprendizaxe da escritura e da lectura son fudamentais porque nelas susténtanse as aprendizaxes posteriores que se deben levar a cabo ao longo da vida.

Ti es o máis indicado/a para saberes o teu nivel de lectura: tanto de sílabas, palabras, de secuencias oracionais como de comprensión de textos. Cos exercicios que che imos propoñer poderás saber as túas fortalezas e debilidades. Non dubides en compartir co teu profesor/a calquera dúbida que teñas respecto ao teu nivel lector. Se les ben, aprenderás máis doadamente e mellorará o teu nivel de expresión. E ademais, contribuirá a que acades obxectivo de falares galego cada vez mellor!