Eixes da proposta didáctica

Esta proposta didáctica está baseada na programación didáctica modelo de PROENS de "Ciencias Sociais" de 6º de Educación Primaria. Refírese ás unidades 3. Planeta e clima e 4. Vida sustentable en sociedade.

Neste REA, centrado na creación dun minimundo sostible e no estudo das zonas climáticas, os ecosistemas e a sustentabilidade, se tratarán os seguintes eixes:

Promoción dunha actitude crítica e reflexiva sobre a pegada ecolóxica e o impacto das actividades humanas no medio ambiente.
Desenvolvemento da capacidade para identificar e analizar os cambios nos ecosistemas e a importancia da súa preservación.
Estudo das grandes zonas climáticas, ecosistemas e paisaxes do planeta, fomentando o respecto pola diversidade natural.
Comprensión das interaccións entre os factores climáticos, a vexetación, a fauna e a actividade humana.
Desenvolvemento de habilidades para interpretar gráficas e datos relacionados co clima e o medio ambiente.
Mellora do vocabulario científico e capacidade para realizar investigacións relacionadas co medio natural e a sustentabilidade.
Reflexión sobre os dereitos, deberes e liberdades recollidos na Constitución española, promovendo valores como a responsabilidade cidadá e o compromiso co medio ambiente.
Aprendizaxe sobre as normas de seguridade viaria e o seu impacto na convivencia e a protección dos ecosistemas.
Uso de recursos educativos e ferramentas dixitais para investigar, reflexionar e comunicar as aprendizaxes adquiridas.
Creatividade aplicada ao deseño do minimundo sostible, integrando coñecementos científicos e sociais.

Obxectivos de Desenvolvemento Sostible (ODS) cos que conecta a unidade didáctica

Esta unidade didáctica está aliñada con varios ODS destacando os seguintes:

ODS 4: Educación de Calidade

Proporcionar unha aprendizaxe inclusiva e equitativa que desenvolva competencias globais e conciencia ambiental no alumnado.

ODS 11: Cidades e Comunidades Sostibles

Reflexionar sobre a importancia de crear espazos habitables sostibles, promovendo un equilibrio entre o desenvolvemento humano e o medio natural.

ODS 12: Produción e Consumo Responsables

Promover o consumo responsable e a redución da pegada ecolóxica individual e colectiva.

ODS 13: Acción polo Clima

Fomentar a educación ambiental e a acción responsable para combater o cambio climático.

ODS 15: Vida dos Ecosistemas Terrestres

Protexer, restaurar e promover o uso sostible dos ecosistemas terrestres, combatendo a degradación do solo e a perda da biodiversidade.

Deste xeito, a unidade didáctica promove non só o coñecemento científico e o pensamento crítico, senón tamén o compromiso co planeta e a sustentabilidade global.

Contidos, obxectivos específicos e competencias clave

Este REA axústase ás seguintes Unidades Didácticas da programación didáctica de referencia publicada en PROENS (curso 2023-2024, na súa primeira edición) para o 6º curso de Educación Primaria na materia de Ciencias sociais:

UD 3. Planeta e clima.
UD 4. Vida sustentable en sociedade.

Este recurso recolle obxectivos contidos e competencias clave correspondentes aos seguintes bloques da materia:

Bloque 1: Ciencia e tecnoloxía
Bloque 2: O mundo e o desenvolvemento sostible.
Bloque 3: Vivir en sociedade.
Bloque 4: Leccións do pasado.

Contidos	Bloque da materia
C1.1 - Fases da investigación científica (observación, formulación de preguntas e predicións, planificación e realización de experimentos, recollida e análises de información e datos, comunicación de resultados...). Iniciativa emprendedora. C1.2 - Técnicas para unha adecuada exposición oral dos resultados dunha investigación, con claridade e orde. Presentación de resultados en formatos diversos. C1.3 - Vocabulario científico básico relacionado coas diferentes investigacións. Realización dun glosario. C1.4 - Fomento da curiosidade, a iniciativa, a constancia e o sentido da responsabilidade na realización das diferentes investigacións. C1.5 - A relación entre os avances en matemáticas, ciencia, enxeñería e tecnoloxía para comprender a evolución da sociedade no ámbito científico-tecnolóxico. C1.6 - Estratexias de procura e selección de información en Internet seguras e eficientes (valoración, discriminación, selección, organización e propiedade intelectual); recoñecemento de riscos asociados a un uso inadecuado e pautas de actuación. C1.7 - Estratexias de recollida, almacenamento e representación de datos para facilitar a súa comprensión e análise, individual e cooperativamente, facilitando o diálogo e a resolución de conflitos.	Bloque 1
C2.2 -O clima e o planeta. Introdución á dinámica atmosférica e ás grandes áreas climáticas do mundo. Os principais ecosistemas e as súas paisaxes. C2.3 - A contorna que nos rodea. A diversidade xeográfica de España e de Europa. Representación gráfica, visual e cartográfica a través de medios e recursos analóxicos e dixitais usando as tecnoloxías da información xeográfica (TIX). C2.4 - O cambio climático. Responsabilidade ecosocial. Ecodependencia, interdependencia e interrelación entre persoas, sociedades e medio natural. C2.5 - Axenda urbana. O desenvolvemento urbano sustentable. A cidade como espazo de convivencia. C2.6 - Economía verde. A influencia dos mercados (de bens, financieiro e laboral) na vida da cidadanía. Os axentes económicos e os dereitos laborais desde unha perspectiva de xénero. O valor social dos impostos. Responsabilidade social e ambiental das empresas. C2.7 - Estilos de vida sustentables: a pegada ecolóxica.	Bloque 2
C3.6 - Cidadanía activa. Fundamentos e principios para a organización política e xestión do territorio en España. Participación social e cidadá. C3.8 - Seguridade viaria. Normas básicas de circulación, sinais de tráfico e marcas viarias. Condutas e hábitos viarios correctos. Causas e grupos de risco nos accidentes de tráfico.	Bloque 3
C4.5 - O patrimonio natural e cultural como ben e recurso; o seu uso, coidado e conservación.	Bloque 4

Este recurso está orientado a acadar os seguintes obxectivos da materia de Ciencias Sociais:

Obxectivos	Descrición
OBX1	Utilizar dispositivos e recursos dixitais de forma segura, responsable e eficiente para buscar información, comunicarse e traballar de maneira individual, en equipo e en rede.
OBX2	Expor e dar resposta a cuestións científicas sinxelas, utilizando diferentes técnicas, instrumentos e modelos propios do pensamento científico, para interpretar e explicar feitos e fenómenos que ocorren no medio natural, social e cultural.
OBX3	Identificar as características dos diferentes elementos ou sistemas do medio natural, social e cultural, analizando a súa organización e as propiedades e establecendo relacións entre estes, para recoñecer o valor do patrimonio cultural, conservalo, melloralo e emprender accións para o seu uso responsable.
OBX4	Identificar as causas e consecuencias da intervención humana na contorna, desde os puntos de vista social, económico, cultural, tecnolóxico e ambiental, para mellorar a capacidade de afrontar problemas, buscar solucións e actuar de maneira individual e cooperativa na súa resolución, e para poñer en práctica estilos de vida sustentables e consecuentes co respecto, o coidado e a protección das persoas e do planeta.
OBX6	Recoñecer e valorar a diversidade e a igualdade de xénero, mostrando empatía e respecto por outras culturas e reflexionando sobre cuestión éticas, para contribuír ao benestar individual e colectivo dunha sociedade en continua transformación e ao logro dos valores de integración europea.
OBX7	Participar na contorna e na vida social de forma eficaz e construtiva desde o respecto aos valores democráticos, aos dereitos humanos e da infancia e aos principios e valores do Estatuto de autonomía de Galicia, da Constitución española e da Unión Europea, valorando a función do Estado e das súas institucións no mantemento da paz e da seguridade integral cidadá para xerar interaccións respectuosas e equitativas e promover a resolución pacífica e dialogada dos conflitos.

A continuación relaciónanse as competencias clave desenvolvidas no recurso cos descritores operativos.

Competencias clave	Clave dos descritores operativos
CCL: Competencia en comunicación lingüística.	CCL1, CCL2, CCL3, CCL5
CP: Competencia plurilingüe	CP2, CP3
STEM: Competencia matemática e competencia en ciencia, tecnoloxía e enxeñaría	STEM1, STEM2, STEM4, STEM5
CD: Competencia dixital.	CD1, CDD2, CD3, CDD4, CD5
CPSAA: Competencia persoal, social e de aprender a aprender	CPSAA1, CPSAA3, CPSAA4
CC: Competencia cidadá.	CC1, CC2, CC3, CC4
CE: Competencia emprendedora.	CE1
CCEC: Competencia en conciencia e expresións culturais	CCEC1, CCEC4