O REA Pero ¡qué animal! ten como finalidade a organización dun debate no que o alumnado, organizado en equipos, afondará en temas como o benestar e os dereitos dos animais de compañía, así como os dereitos e obrigas dos coidadores. Para prepararnos, traballarase na creación de textos argumentativos e de opinión, mellorando as habilidades gramaticais e prestando especial atención aos elementos da oratoria. Aproveitarase para propiciar a reflexión e o diálogo, facendo fincapé no respecto á diversidade de opinións. Este enfoque permitiranos medrar individualmente nas propias capacidades argumentativas, pero tamén fomentar un ambiente de respecto mutuo e benestar colectivo dentro da aula.

 As diferentes fases do REA están deseñadas partindo das características do DUA. Preséntase a información e as tarefas en diferentes modalidades, formatos e niveis, facilitando así o acceso a todas as realidades do alumnado.

Pretendemos que este REA sirva non só para a consecución dos obxectivos establecidos senón que vaia máis alá, e axude ao alumnado a debater con calma e escoitar con empatía cada vez que teña que tomar unha decisión en clase, co seu grupo de amizades, no seu equipo deportivo, familia ou en calquera ámbito da vida cotiá.