Orientacións e recomendacións de uso

Recursos materiais necesarios

Neste REA están incluídos os materiais necesarios para o seu desenvolvemento. Facilítanse tanto en formato pdf como en formato editable, para que o profesorado que así o desexe poida modificalos ou adaptalos.

Ademais, o alumnado precisará ordenador con conexión a internet, unha gravadora (que pode ser un teléfono móbil) e acceder a aplicacións dixitais da súa elección para a elaboración das infografías, do tríptico informativo e do vídeo explicativo.

Proposta de agrupamentos para actividades grupais

Para a realización do reto, recoméndase que o profesorado deseñe grupos heteroxéneos de 4 persoas en función das súas capacidades diversas, para que cada quen poida desenvolver o seu máximo potencial. Ademais de aumentar a súa propia autonomía persoal, co traballo cooperativo o alumnado realizará prácticas comunicativas para acadar consensos e lograr a resolución dialogada de conflitos.

Dentro dun mesmo grupo, haberá diferentes roles: persoa coordinadora, persoa voceira, persoa redactora, persoa investigadora. Co obxectivo de que todo alumnado mellore as súas destrezas, aconséllase que estes roles roten en cada tarefa.

As actividades individuais están deseñadas para que o alumnado consolide os contidos teóricos. Estas tarefas facilitarán que o alumnado reforce os coñecementos necesarios para abordar con éxito a elaboración do produto final.

Produtos finais

É fundamental que o alumnado coñeza con claridade o proxecto desde o principio. Unha presentación motivadora mellora a implicación do alumnado porque sabe que debe facer e con que obxectivo traballa. Neste caso, os produtos finais esperados son os seguintes:

Tríptico informativo. Antes de comezar a súa elaboración, convén revisar co alumnado a rúbrica de avaliación e promover tanto a autoavaliación como a coavaliación das propostas.
Vídeo explicativo da proposta completa da viaxe.

A presentación da proposta do grupo permitirá mellorar as destrezas en expresión oral do alumnado.

Enfoque multinivel do reto

O enfoque multinivel permite que todo o alumnado, independentemente do seu punto de partida, sexa quen de aprender de maneira progresiva a partir dunha variedade de recursos que proporcione oportunidades para aprender atendendo a diferentes niveis de dificultade.

Por iso, indícanse a continuación tres niveis de dificultade para cada reto:

Nivel de dificultade	Tríptico informativo	Vídeo explicativo
Nivel 1. Básico	Realizar a fase de documentación e selección da información a través de fontes de Internet fiables preseleccionadas polo profesorado. Incluír unha investigación básica sobre o destino turístico: historia, cultura, gastronomía e principais lugares de interese. Utilizar un modelo predeseñado para a creación e a elaboración do tríptico. Explicar os aspectos máis importantes de forma clara e resumida.	Elaborar un vídeo breve e sinxelo, no que predomine a imaxe das persoas que explican os destinos turísticos que se visitarán, os medios de transporte, o aloxamento escollido e o presuposto. Amosar durante a presentación oral os elementos gráficos de apoio (imaxes, mapas...). Marcar con conectores os diferentes apartados e utilizar un léxico apropiado.
Nivel 2. Intermedio	Realizar a fase de documentación e selección da información a través de fontes de Internet fiables escollidas polo propio alumnado. Incluír unha investigación profunda sobre o destino turístico: historia, cultura, actividades turísticas, aloxamentos, gastronomía, festas típicas e principais lugares de interese. Crear un deseño propio que incorpore elementos gráficos (imaxes libres de dereitos e mapas). Organizar a información e expoñela de forma coherente.	Realizar un vídeo que desenvolva e contextualice cada un dos apartados da viaxe de forma xerarquizada e coherente. Falar con claridade, cunha pronuncia clara e ritmo fluído. Incorporar imaxes e outros elementos gráficos para organizar a información e captar a atención.
Nivel 3. Avanzado	Realizar a fase de documentación e selección da información a través de fontes fiables e variadas buscadas polo propio alumnado. Efectuar unha investigación máis profunda sobre o destino turístico, que inclúa unha análise crítica sobre os aspectos culturais, sociais e económicos do destino. Crear un deseño innovador, atractivo e orixinal mediante o uso de ferramentas máis avanzadas (InDesign, por exemplo) e con imaxes ou outros elementos gráficos que respecten os dereitos de autoría. Incorporar indicacións para a sustentabilidade das prácticas turísticas tras unha investigación sobre o impacto ambiental do turismo. Organizar a información de forma coherente e usar códigos QR para acceder á información adicional (estatísticas turísticas, opcións de ecoturismo...).	Adaptar o ton da comunicación ao público obxectivo cun léxico variado e unha entoación expresiva. Aplicar no vídeo principios de deseño, como unidade, contraste, movemento ou centro de interese. Incluír mecanismos de persuasión eficaces, cunha introdución atraente, un desenvolvemento claro e un peche efectivo.